Taıaýda Qazaqstan boks federasııasynyń (QBF) prezıdenti Keńes Raqyshev qyzmetinen ketip, onyń ornyna Shahmurat Mútálip keldi. Qazirgi kezde atalǵan uıymda biraz aýys-túıister bolyp jatyr. О́tken aptada ataqty boksshy Muhtarhan Dildábekov QBF-nyń bapkerler shtabymen jumys jónindegi vıse-prezıdenti bolyp taǵaıyndaldy. Asa aýyr salmaqta aıqasqan 47 jastaǵy Alashtyń maqtan tutar azamaty kezinde Sıdneı Olımpıadasy men álem chempıonatynyń kúmis júldegeri, Azııa oıyndarynyń jeńimpazy jáne eki dúrkin fınalısi, Álem kýboginiń júldegeri atanǵanyn jurt jaqsy biledi. Bylǵary qolǵabyn shegege ilse de Muhtarhan osy saladan alystap ketken joq. Qazirgi kezde ol – Shymkenttegi sport mektepteriniń biriniń dırektory.
Túrkııanyń Antalıa qalasynda taekvondodan G1 sanatyndaǵy «Turkish Open» halyqaralyq týrnıri ótti. Jer jahannyń 60 memleketinen kelgen 1 900 sportshy ónerin ortaǵa salǵan jarysta Qazaqstannyń daıan sheberleri úsh júldege qol jetkizdi: Jansel Denız ben Samırhon Ábýbákirov (73 kg) kúmispen kúptelse, Rýslan Japarov (+87 kg) qolaǵa qol sozdy.
2026 jyly Italııanyń Mılan men Kortına d’Ampesso qalalarynda alaýy tutanatyn XXV qysqy Olımpııa oıyndarynyń irikteý saıysynda Qazaqstannyń hokkeıshileri qaı komandalarmen kúsh synasatyny belgili boldy. Jerlesterimiz D tobyna tústi. Qarsylastarymyz – Slovakııa, Aýstrııa jáne Majarstan. Bul básekeler 29 tamyz ben 1 qyrkúıek aralyǵynda Bratıslavada ótedi. Irikteý týrnırinde barlyǵy 12 memlekettiń ókilderi sheberlik baıqasady.
Halyqaralyq fýtbol federasııasynyń (FIFA) jańartylǵan reıtınginde Qazaqstan quramasy óziniń 100-ornyn saqtap qaldy. Burynǵy KSRO-nyń quramynda bolǵan memleketter arasynda Ýkraına (22), Reseı (38), О́zbekstan (68), Belarýs (95) jáne Tájikstan (99) bizden ozyp tur. Al TOP-10 komandanyń qataryna myna komandalar endi: Argentına, Fransııa, Anglııa, Belgııa, Brazılııa, Nıderland, Portýgalııa, Ispanııa, Italııa jáne Horvatııa.
Kásipqoı rıngte kúsh synasyp júrgen Qazaqstannyń boksshysy Angelına Lýkas óziniń kelesi jekpe-jegin 29 aqpanda Taılandtyń astanasy Bangkokta ótkizedi. Ol Kadesara Djadpakdemen judyryqtasady. Jergilikti bylǵary qolǵap sheberiniń rekordy – 10 kezdesý, 7 jeńis, 3 jeńilis. Jerlesimiz alty básekeniń tek bireýinde ǵana utyldy.