Búgin Úkimet otyrysynda «Jaıly mektep» ulttyq jobasyn iske asyrý barysy qaraldy. Jıynda Premer-mınıstr «Jaıly mektep» jobasyn iske asyrýda belgili bir shıkilikter baryn aıtty, dep habarlaıdy Egemen.kz Úkimettiń baspasóz qyzmetine silteme jasap.
Úkimet basshysynyń aıtýynsha, mektepter áý bastan sıfrlyq kameralarmen jabdyqtalyp, polısııanyń Jedel basqarý ortalyqtaryna jalǵanýy tıis. Oǵan qosa jańa, ınteraktıvti oqytý ádisterin qoldanýǵa múmkindik beretin jyldamdyǵy joǵary ınternet júrgizilýi kerek.
Premer-mınıstr ulttyq jobany iske asyrýda belgili bir shıkilikter baryn aıtty. Atap aıtqanda, Memleket basshysy ýchaskelerdi bólý jáne jobalyq qujattamany ázirleý qarqynyn synǵa aldy. Osyǵan baılanysty barlyq problemany qysqa merzimde joıý tapsyryldy.
«Qurylys materıaldaryn, jabdyqtar men jıhazdardy satyp alý isine barynsha otandyq óndirýshilerdi tartý qajet. Jalpy Memleket basshysynyń jańa formattaǵy mektepter salý týraly tapsyrmasyn oryndaý úshin bar kúshimizdi jumyldyrýymyz kerek», dedi ol.
Oǵan qosa Úkimet basshysy obektiler ashylǵannan keıin birden naqty josparly oqý prosesin uıymdastyrý úshin salynyp jatqan mektepterdi aldyn ala pedagog kadrlarmen qamtamasyz etý kerek ekenin aıtty.
«Biz Ulttyq jobany iske asyrý barysyn maýsym aıynda qaıta qaraımyz. Eger jumys tásili ózgermese, jaýapty tulǵalarǵa qatań sharalar qoldanylady», dep túıindedi Oljas Bektenov.