Úkimet basshysy Oljas Bektenov elde kóktemgi sý tasqynyna qarsy atqarylýy tıis 218 tapsyrmanyń 92 -si áli kúnge oryndalmaı otyrǵanyn aıtty. Sondaı-aq Premer-mınıstr qazirdiń ózinde respýblıkadaǵy keı aýyldar men kóshelerdiń sý basqanyn basa aıtty. Jaýaptylardy jumysqa selqos qaramaýǵa shaqyrdy, dep jazady Egemen.kz.
Oljas Bektenovtiń dereginshe bıyl kóktemde sý tasqyny qaýpi joǵary. Sonyń ishinde 217 eldi mekendi sý basý yqtımaldyǵy joǵary. Tasqynnyń bolýyna kóktemgi jańbyr men qar sýynyń áserin eskergen Úkimet basshysy aýyl ishindegi qardy tazalaýǵa jetkilikti qarjy bólmegen óńirlerdi synǵa aldy.
«Mysaly, Pavlodar oblysynda qar shyǵarýǵa bólingen 4,5 mlrd teńgeniń 900 mln teńgesi ǵana aýyldyq jerlerge kózdelgen. Qaraǵandy oblysynda 5,4 mlrd teńgeniń 700 mln teńgesi aýyldarǵa arnalǵan. Aqtóbe oblysynda – nebári 100 mln teńge. О́ńir ákimderi qardy, ásirese aýyldyq jerlerde ýaqtyly shyǵarý úshin sharalar qabyldaýy qajet. Aıta ketý kerek, eldi mekenderdiń kóshelerin sý basyp qalý jáne birqatar óńirde joldardy shaıyp ketý faktileri qazirdiń ózinde tirkelip otyr», dedi Oljas Bektenov.
Ol Tótenshe jaǵdaılar mınıstrligine kóktemgi tasqynǵa daıyndyq barysyn pysyqtaıtyn jumystardyń formatyn aýystyrýdy usyndy. Sonymen qatar Premer-mınıstr qar sýy qursaýynda qalý qaýpi joǵary aýyldardy baqylaýdy kúsheıtýdi tapsyrdy.
«Joldardyń sý basyp qalýyna baılanysty Aqmola oblysynda Iаgodnoe, Qostanaı oblysynda Ekidiń, Aqtóbe oblysyndaǵy Oımaýyt, Jaryq, О́tek jáne Qumtoǵaı aýyldarymen jyl saıyn qatynas úzilip qalady. Ákimdikter bul problemalardy bile tura, eshqandaı shara qabyldamaıdy. Biraz sharýa ákimdikterdiń naqty jumysyna baılanysty. Sondaı-aq aryqtardy, jaýyn-shashyn kárizderin ýaqtyly tazartý, ýaqytsha bógetter salý jáne eldi mekenderde topyraq úıindilerimen bekitý jumystaryn qamtamasyz etýleri qajet», dedi Úkimet basshysy.
Oljas Bektenov sý tasqynynyń aldyn alý jumystaryn jandandyrý men baqylaýdy orynbasary Roman Sklıarǵa júktedi.