Elimizde endi jol erejesin buzǵan júrgizýshiler avtomatty túrde anyqtalady. Bul týraly IIM Ákimshilik polısııa komıtetiniń erekshe tapsyrmalar jónindegi aǵa ınspektory Aqtoty Boranova aıtty, dep habarlady Egemen.kz.
Onyń aıtýynsha, qazir Qazaqstan joldarynda jol qozǵalysy erejesin buzýdy tirkeıtin 22 myń beınebaqylaý kamerasy ornatylǵan. Búginde polısııa jol erejesin buzǵan júrgizýshilerdi avtomatty túrde anyqtaýǵa kirisken.
- Biz «Qorǵaý» baǵdarlamasyn qoldanamyz. Ol jalǵan nómirleri bar, saqtandyrýsyz, izdeýde júrgen nemese jol qozǵalysy erejesin buzatyn jáne aıyppul tólemeıtin kólikterdi avtomatty túrde anyqtaýǵa múmkindik beredi. Buryn barlyq kólikti toqtatyp, qujattardy tekserý qajet bolatyn. Al qazir júıe kóshedegi beınebaqylaý kamelarynyń derekterin taldaı otyryp, jaqyn mańdaǵy polıseıdiń planshetine «qaýipti» júrgizýshiniń jaqyn jerde júrgeni týraly habarlama jiberedi. Nátıjesinde polısııa áreket etedi, - dedi Aqtoty Boranova IIM-de ótken baspasóz máslıhatynda.
IIM ókili jol erejesin óreskel buzǵan júrgizýshiler anyqtalyp jatqanyn jetkizdi.
- Baǵdarlamanyń kómegimen jalǵan nómirlerdi paıdalanýdyń 1,5 myńǵa jýyq faktisi, júrgizýshi kýáliginen aıyrylǵan 6 myń júrgizýshi anyqtalyp, 8,5 myń memlekettik nómir tárkilendi. Aıyppul turaǵyna 29 myń avtokólik qamaýǵa alyndy, - dedi aǵa ınspektor.
Aqtoty Boranova jol qozǵalysy erejesin buzýdy tirkeıtin kameralar basqa óńirlerde de ornatylatynyn jetkizdi.
- О́ńirlerde mundaı kameralardyń, onyń ishinde «Qorǵaý» júıesine qosylǵan kameralardyń jelisin keńeıtý usynylady. Bul kólik júrgizý mádenıetin arttyrýǵa, jol erejesin buzǵandardy jaýapqa tartýǵa múmkindik beredi, - dedi aǵa ınspektor.