Qazaqstan turǵyndary kelesi aıdan bastap terapevtiń joldamasynsyz dárigerlerge kórine alady, dep habarlaıdy Egemen.kz.
Densaýlyq saqtaý mınıstrligi medısınalyq qyzmet kórsetý standarttaryna ózgerister engizdi.
О́zgeristerge sáıkes, naýryz aıynan bastap josparly emhanaǵa jatqyzý úshin taldaýlar tizimin 42 saraptamaǵa qysqartý, sondaı-aq olardyń jaramdylyq merzimin 10 kúnnen 14 kúnge jáne 1 aıdan 3 aıǵa deıin uzartý josparlanǵan.
Sáýir aıynan bastap mamandandyrylǵan dárigerlermen tikeleı baılanysý tásilderi jetildiriledi. Pasıent kelesi jaǵdaılarda jalpy tájirıbelik dárigerdiń joldamasynsyz mamandandyrylǵan dárigerge tikeleı bara alady:
- tótenshe jaǵdaılar men jaraqattar, sonyń ishinde oftalmologııalyq, otorınolarıngologııalyq jáne basqa da jaraqattar;
- shuǵyl jáne josparly stomatologııalyq kómek kórsetý;
- dermatovenerologııalyq profıldi aýrýlar;
- tirkelgen jeri boıynsha akýsher-gınekolog pen psıhologtyń qabyldaýyna jazylý;
- onkolog pen onkogematologtyń qabyldaýy;
- dıspanserlik esepte turǵan naýqastar úshin kardıolog, endokrınolog, oftalmolog, nevropatolog, hırýrgtyń qabyldaýyna jazylý;
- mamandandyrylǵan mamannyń taǵaıyndaýy boıynsha qaıtalaný;
- jastar densaýlyq ortalyqtaryndaǵy mamandardyń qabyldaýyna;
- jyljymaly medısınalyq keshenderdiń qyzmetterin jáne basqa da jyljymaly qyzmetterdi kórsetý kezinde.
- Sáýir aıynan bastap dınamıkalyq baqylaý júrgizý tártibi men jalpy tájirıbelik dáriger men mamandandyrylǵan dárigerlerdiń birlesken jumysynyń algorıtmi qaıta qaralady, bul mýltıdıssıplınarlyq kózqarasty qamtamasyz etedi. Osy jumys aıasynda árbir naýqas jeke zertteýdiń jıiligi men kólemi anyqtalady, – dep jazdy mınıstrlikten.