2024 jylǵy 29 aqpannan 1 naýryzǵa qaraǵan túni Mańǵystaý, Atyraý, Batys Qazaqstan, Aqtóbe jáne Qyzylorda oblystarynan basqa barlyq aımaqtar biryńǵaı ýaqyt beldeýine kóshedi, dep habarlaıdy Egemen.kz QR Sıfrlyq damý, ınnovasııalar jáne aeroǵarysh mınıstrligine silteme jasap.
Osy is-sharany júzege asyrý maqsatynda kelesi sharalar qabyldandy:
1. IANA (Internet mekenjaı keńistiginiń ákimshiligi), HEBO, RSS, ICANN, IETF, IESG syndy halyqaralyq uıymdarǵa Qazaqstannyń biryńǵaı 5-shi ýaqyt beldeýine kóshýi, sondaı-aq Qazaqstan úshin ýaqyt beldeýleriniń (time zone database) jalpyǵa qoljetimdi derekqoryndaǵy derekterdi jańartý qajettiligi týraly resmı habarlandy.
Osyǵan baılanysty abonentter shyǵarylǵan jańartýlardy Android jáne IOS sııaqty halyqaralyq operasııalyq júıelermen jańartýy qajet.
2. Sıfrlyq damý mınıstriniń tapsyrmasyna sáıkes, baılanys operatorlary:
ózderiniń aqparattyq júıeleriniń qajetti ólshemderin daıyndaý boıynsha uıymdastyrýshylyq-tehnıkalyq is-sharalaryn ótkizedi; uıaly baılanys operatorlarynyń qysqa mátindik habarlamalardy jiberýin, sondaı-aq ınternet-resýrsta jáne mobıldi qosymshada (bar bolǵan jaǵdaıda) habarlaýdy qosa alǵanda, qyzmet kórsetý arnalary arqyly óz abonentteri men paıdalanýshylaryna júrgizilip jatqan jumystar týraly aldyn ala habarlaý boıynsha sharalardy júzege asyrady; Internetti qosa alǵanda, usynylatyn baılanys servısteri men qyzmetteriniń turaqtylyǵyn saqtaý, sondaı-aq tarıftiń aı saıynǵy tólemin eki ese esepteý jaǵdaılaryn boldyrmaý maqsatynda tehnıkalyq ınfraqurylymdy daıyndaıdy.Tolyǵyraq aqparat alý úshin baılanys operatorlaryna habarlasýǵa bolady.