Batys Qazaqstan oblysyna jumys sapary barysynda Premer-mınıstr Oljas Bektenov birqatar ónerkásiptik kásiporyndarǵa bardy. Qazirgi ýaqytta Úkimet otandyq óndirýshilerdi tolyq qýatyna shyǵarý úshin qajetti jaǵdaılar jasaýǵa kúsh salyp jatyr. Bul otandyq óndiristiń damýyna eleýli serpin berip, ımporttyń úlesin tómendetedi, sondaı-aq jańa jumys oryndaryn qurýǵa múmkindik beredi, dep habarlaıdy Egemen.kz Úkimettiń baspasóz qyzmetine silteme jasap.
Oljas Bektenov elimizde 60 jyldan beri TJM qyzmetteri men kommýnaldyq kásiporyndardy arnaıy tehnıkamen qamtamasyz etip kele jatqan iri kompanııalardyń biri – «Oralagroremmash» AQ-ǵa bardy. О́tken jyly munda 120-dan astam arnaıy tehnıka jáne 115 tirkeme shyǵaryldy. Bul rette kásiporynnyń óndiristik júktemesi 20%-dan aspaıdy.
Premer-mınıstr shyǵarylatyn ónim úlgilerimen tanysty. О́ndiriletin órtke qarsy tehnıkany tekserý kezinde Úkimet basshysy kóp qabatty turǵyn úıler deńgeıinde qutqarý jumystaryn júrgizý úshin órt sóndirý satylaryn óndirý qajettigin atap ótti.
Birqatar salalyq mınıstrlikterge otandyq kompanııalarmen ózara is-qımyldy arttyrý múmkindigin qarastyrý tapsyryldy. О́z kezeginde kásiporyndar óndiris jelisin jańartý jáne keńeıtý prosesin jalǵastyrýy kerek. Mashına jasaýdy damytý árdaıym iri bólshekterdi qurastyrýdan bastalyp, odan ári shaǵyn quramdas bólshekterdi óz betinshe shyǵarýǵa kóshetini atap ótildi.
«Memleket óńdeý sektoryn damytýǵa basty nazar aýdarady. Kásiporynda barlyǵy tolyq qýatynda jumys isteýi kerek. Biz qazir otandyq óndirýshini qoldaý baǵdarlamasyn ázirlep jatyrmyz. Satyp alýda lokalızasııasy joǵary kásiporandarǵa basymdyq berý kerek», dedi Oljas Bektenov.
Atys jáne zeńbirek qarý-jaraǵyn óndirýge mamandanǵan biregeı kásiporyn – «Batys Qazaqstan mashına jasaý kompanııasy» AQ-da Premer-Mınıstr Oljas Bektenov shyǵarylatyn joǵary sapaly qorǵanys ónimderine álemdik naryqta suranys joǵary ekenine basa nazar aýdardy. Sondaı-aq ol kompanııa júktemesiniń 60% deńgeıinde ekenin eskere otyryp, aralas óndiristerdi qurý qajettigin atap ótti.
Ári qaraı Premer-mınıstr qańyltyr, polıetılen jáne polıpropılen qubyrlaryn, halyq tutynatyn plastmassadan jasalǵan taýarlardy óndiretin kásiporyn – «Oral saýda-ónerkásip kompanııasy» JShS-nyń jumysymen tanysty. Zaýyttyń jyldyq qýaty 37,5 myń tonna polıetılen buıymyn shyǵarýǵa jetkilikti bola tura, byltyr júkteme 20%-dy quraǵan. Shyǵarylatyn ónim jańartýdy jáne jańǵyrtýdy qajet etetin gazben, sýmen jabdyqtaý, telekommýnıkasııa júıelerine arnalǵanyn atap ótken jón.
Oǵan qosa óńirde Úkimet basshysy qýaty jylyna 5 mln polıpropılen qapshyǵyn (bıgbegter) shyǵaratyn «Packaging Systems» kásipornyna bardy. Joba ótken jyldyń kúzinde aımaqqa sheteldik kompanııalardy ornalastyrý aıasynda paıdalanýǵa berildi. О́ndiriletin bıgbegter qazirgi ýaqytta Qazaqstanda paıdalanylady, sondaı-aq EAEO jáne EO elderine eksporttalady.
«Investısııa tartý úshin barynsha kúsh salýymyz kerek. Otandyq nemese sheteldik ınvestorlar bolsyn – olar bizdiń ekonomıkamyz úshin mańyzdy. Sondyqtan biz ınvestorlar úshin qolaıly jaǵdaı jasaýymyz kerek», dedi O. Bektenov.
О́nerkásip nysandaryn aralaý qorytyndysy boıynsha Úkimet basshysy ónerkásiptiń qarqyndy ósýin jáne ekonomıkany ındýstrııalandyrýdy qamtamasyz etý úshin qarjylyq jáne qarjylyq emes qoldaý sharalary boıynsha kásipkerlik sýbektilerine qoldaý kórsetý sharalaryn kúsheıtýdi tapsyrdy.