Shymkentte jalǵan órt sóndirýshi hostel meńgerýshisin aldap, aqshasyn jymqyrǵan, dep jazady Egemen.kz Polisia.kz-ke silteme jasap.
«Alaıaqty jedel is-sharalardyń nátıjesinde qalalyq PD-nyń kıberpolıseıleri ustady. Ustalǵan azamat Shý qalasynyń 27 jastaǵy turǵyny. Tergeý barysynda anyqtalǵany, ol buryn-sońdy osy qonaq úıde birneshe ret bolyp, meńgerýshiniń jeke nómirin bilip alǵan. Keıin oǵan habarlasyp, ózin órt sóndirý qyzmetkeri retinde tanystyrdy. Qaskóı hostel ǵımaraty qaýipsizdik talaptaryna tolyq saı kelmeıtinin jáne tıisti sertıfıkattyń merzimin 58 myń teńgege uzarta alatynyn jetkizgen. Aldanǵan azamat birden qajet somany aıtylǵan shotqa aýdarǵan. Ýaqyt óte alaıaqtyń arbaýyna túskenin bilgen jábirlenýshi polısııaǵa osy jaıt týraly habarlaǵan. Qazirgi tańda qylmystyq is aıyptaý aktisimen sotqa joldandy», delingen aqparatta.
Quqyq qorǵaýshylar beıtanys adam qońyraý shalyp, túrli máseleńizdi sheshý úshin aqsha talap etse, birden baılanysty úzýge keńes beredi.