Úkimet otyrysynda Almaty qalasyndaǵy jer silkinisine qatysty jaǵdaı qaralyp jatyr, dep habarlaıdy Egemen.kz Úkimettiń baspasóz qyzmetine silteme jasap.
«Qazir oryn alǵan jaǵdaıdy esepteý-baǵalaý jumystary jalǵasyp jatyr. Tótenshe jaǵdaılar mınıstrligi eldegi seısmologııalyq ahýalǵa turaqty monıtorıngti qamtamasyz etýi kerek. Kúshter men quraldar saqadaı saı bolýǵa tıis. Sondaı-aq Tótenshe jaǵdaılar mınıstrligi elimizdiń taýly aımaqtarynda sel jáne laı kóshkini júrý qaýpine qatysty tıisti monıtorıngti qamtamasyz etýi kerek. Tótenshe jaǵdaı qaýpi týyndaǵan kezde shuǵyl áreket etý sharalaryn qabyldaý kerek», dedi Premer-mınıstr Oljas Bektenov.
Tótenshe jaǵdaı mınıstri Shyńǵys Árinovtiń baıandaýynsha respýblıkalyq jáne óńirlik jedel shtabtar qurylyp, 384 azamattardy qabyldaý pýnkti uıymdastyryldy. Táýlik boıy «jedel jeli» jumys istep tur. Oqıǵa oryn alǵan kúni qabyldaý pýnktterinde úsh myńǵa jýyq adam ornalasty. Ákimdiktermen qıraǵan ǵımarattardy anyqtaý boıynsha tekserý jalǵasyp jatyr. Sel qaýpi bar aýmaqtarda aerovızýaldy zertteý júrgizildi. Algorıtmge sáıkes qoǵamdyq tártipti qamtamasyz etý úshin polısııa qyzmetkerleri tartyldy. Almaty qalasy boıynsha barlyq tirshilikti qamtamasyz etý nysandary shtattyq rejımde jumys istep tur. Qazirgi ýaqytta el boıynsha seısmıkalyq jaǵdaı turaqty. TJM profılaktıkalyq jumystardy jalǵastyrady.