Eldegi ózekti ekologııalyq máselelerdi qozǵaǵan senator Sovetbek Medebaev Úkimet basshysyna depýtattyq saýal joldap, aýanyń, sýdyń, topyraqtyń shamadan tys lastaný problemalaryn nazarǵa alýdy surady. Onyń aıtýynsha, Qazaqstan keıingi jyldary 180 eldiń arasynda ekologııalyq tıimdilik reıtınginde 93-inshi orynǵa túsip, Namıbııa, Gabon, Zımbabve sııaqty elderdiń de artynda qalǵan, al jasyl jelekke bólengen elder reıtıngisi boıynsha 78 eldiń ishinde 72-nshi orynda tur. Bul týraly Egemen.kz joǵarǵy Palatanyń baspasóz qyzmetine silteme jasap habarlaıdy.
Depýtattyń aıtýynsha, Astana, Almaty, Aqtóbe, Qaraǵandy, Jezqazǵan qalalarynda jáne Temirtaýdaǵy aýa joǵary deńgeıde lastanǵany baıqalady.
«Ulytaý oblysynyń Jezqazǵan jáne Sátpaev qalalarynda aımaqtaǵy óndiris oryndarynda zııandy gazdardy súzýge arnalǵan qondyrǵylardy jańartý jumystaryn der kezinde júrgizbese óńirdiń ekologııalyq jaǵdaıy kúrt nasharlaýy múmkin. Jezqazǵan óńirindegi negizgi sý kózi - Keńgir sý qoımasy. Ondaǵy sýdyń sapasy qanaǵattanarlyq emes, sý klasy boıynsha IV klass retinde anyqtalǵan. Sýdyń sapasyn jaqsartý boıynsha gıdrologııalyq jumystardy júrgizýmen qatar, Úıtas-Aıdos jerasty sý qubyrynyń qurylysyn da jedeldetý qajet», dedi senator.
Sovetbek Medebaev óndiris oryndarynyń qaldyqtary ashyq jerlerde úıilip jatqanyna da alańdaýshylyq bildirdi. Qatty turmystyq qaldyqtardyń kóp bóligi esh suryptaýsyz shyǵarylyp, qalalyq polıgondarda jınalyp jatyr. Ahýaldyń aýqymdylyǵyn eskergen depýtat el azamattarynyń densaýlyǵyna eleýli qater tónýi múmkin ekenin alǵa tartyp, ózekti máselelerdi sheshý jóninde birqatar sharalardy usyndy.
«Qaýipti qaldyqtar men qoqystardyń mólsherin azaıtý maqsatynda álemdik ekologııalyq standarttarǵa sáıkes ekojúıe engizý joldaryn qarastyrý qajet. Qaldyqtardy, onyń ishinde qurylys qaldyqtaryn jınaýǵa arnalmaǵan jerlerde zańsyz tasymaldaý jáne shyǵarý faktilerin anyqtaý úshin tekserý jáne ózge de sharalar júrgizý arqyly memlekettik baqylaý sharalaryn kúsheıtý kerek. Jergilikti jáne ortalyq atqarýshy organdar birlesip qalalyq, aýdandyq, aýyldyq eldi mekenderde turmystyq qatty qaldyqtardy basqarý, onyń ishinde turmystyq qatty qaldyqtardy bólek jınaý, tamaq jáne qurylys qaldyqtaryn qaıta óńdeý jóninde ınfraqurylym qurý máselesin qarastyrý mańyzdy», dep atap ótti depýtat.