Bıyl V Dúnıejúzilik kóshpendiler oıyndary qarsańynda ótetin «Uly Dala Joryǵy» biregeı marafon-báıgesiniń respýblıkalyq irikteý kezeńiniń bastalý kúni belgili boldy, dep habarlaıdy Egemen.kz.
11 naýryzda «JORYQ» respýblıkalyq at sporty federasııasynyń prezıdenti Baqytjan Turlybekov Soltústik Qazaqstan oblysynyń ákimi Ǵaýez Nurmuhambetovpen kezdesti.
Atap aıtqanda, kezdesý barysynda Ulttyq sport túrleri qaýymdastyǵynyń qoldaýymen ótetin marafon-báıgeniń uıymdastyrý máseleleri talqylandy.
Sondaı-aq jıyn barysynda «Uly Dala Joryǵy» respýblıkalyq irikteý týrynyń ótetin orny men bastalý kúni belgilendi.
Osylaısha, marafon-báıgeniń bastalý núktesi retinde Petropavl qalasyndaǵy Abylaı hannyń murajaı kesheni-rezıdensııasy anyqtaldy. Joba 12 mamyrda bastalyp, 17 mamyrda Astanada aıaqtalady. Býrabaı kýrorttyq aımaǵynyń, Botaı men Bozoq kóne mekenderiniń kórikti jerlerin basyp ótetin marafon-báıgeniń jalpy qashyqtyǵy 500 shaqyrymdy quraıdy.
Úzdik úshtikke engen jeńimpaz komandalar qyrkúıek aıyna josparlanǵan «Uly Dala Joryǵy» halyqaralyq týryna lısenzııaǵa ıe bolmaq.
Qazirgi tańda aımaqtyq irikteý týrlary júrip jatyr, olardyń jeńimpazdary ulttyq irikteý týryna joldama alady.
Respýblıkalyq irikteý kezeńinde ornatylǵan eń úzdik jetistikter Qazaqstannyń rekordtar kitabyna (KINES) engiziledi.
Aıta keteıik, «Uly Dala Joryǵy» – jylqy balasynyń eń myqty tuqymy anyqtalatyn dalalyq laboratorııasy.