Prezıdent Atyraýda ótip jatqan Quryltaıda tarıhı arheologııalyq eskertkishterdi qorǵaý máselesin kóterdi, dep jazady Egemen.kz.
«Biz baı tarıhı-mádenı muralarymyzdy saqtaý úshin arheologııa salasynda tártip ornatýymyz kerek. Elimizde kásibı arheologtar tapshy, arheologııalyq qazba júrgizý úshin lısenzııa berý isinde sheshimin tappaǵan túıtkilder bar. Conyń saldarynan Qazaqstandy arheologııa salasyndaǵy kúmándi adamdar jaılap aldy. Olar qurylys fırmalaryna jekelegen jer telimderiniń tarıhı-arheologııalyq mańyzy joq degen jalǵan ǵylymı qorytyndylar berip júr. Osy qyzmeti úshin qyrýar aqsha alady. Dál sol sııaqty «qaraqshy-arheologtar» máselesi de bar», dedi Prezıdent.
Bul rette Qasym-Jomart Toqaev arheologııa salasyndaǵy keleńsizdikterdi atady.
«Sońǵy jıyrma jyl ishinde elimizdegi asa mańyzdy arheologııalyq eskertkishterdiń kóbi ábden tonaldy. Tipti, elimizdiń aýmaǵynan tabylǵan qundy jádigerlerdi Qazaqstandaǵy, sheteldegi jeke kolleksııalardan jáne álemniń ártúrli murajaılarynan kóretin boldyq. Bul máseleni shuǵyl qolǵa alý kerek. Atap aıtqanda, arheologııa salasyna qatysty zańdardy jetildirý, lısenzııa berý isin retteý jáne arheologııalyq qazba jumystaryn zańsyz júrgizgeni úshin jazany kúsheıtý qajet.
Tarıhı-mádenı mura sanatyna kiretin nysandarǵa restavrasııa jasaý isin retke keltiretin sharalardy kúsheıtken jón. Tarıhı jádigerlerimizdi shetel murajaılarynan Qazaqstanǵa qaıtarý jumystaryn jandandyrý da mańyzdy. Ondaı múmkindik bolmasa, elimizdegi murajaılarǵa qoıý úshin jádigerlerimizdiń dálme-dál kóshirmesin jasaý kerek. Ártúrli fraksııanyń ókili ári Quryltaı múshesi sanalatyn Májilis depýtattary bul máseleni sheshýge kúsh-jigerin salady dep senemin», dedi Q.Toqaev.