Áleýmettik jelide túrki halyqtary áıelderiniń obrazy beınelengen kilemderdi kózińiz shalǵan bolar? Tyń týyndylardyń avtory - Ásel Sabyrjanqyzy Egemen.kz saıtyna suhbat berip, shyǵarmashylyǵy týraly baıandap berdi. Tolyq suhbatty saıtymyzdan oqı alasyzdar.
«Assol» laqap atymen tanymal sýretshi kilemdegi alǵashqy sýretin karantın kezinde salǵanyn aıtty.
«Kilem betine salynǵan áıel beınesin buryn-sońdy eshkim kórmegen, sondyqtan bul óner súıer qaýymnyń kóńilinen shyǵyp, áleýmettik jeli qoldanýshylarynyń oń pikirin jınady», deıdi keıipkerimiz.
Sýretshi Ásel danagóı analarymyz ben batyr apalarymyzdyń beınesin salý úshin túrki halyqtarynyń mıfologııasyn, tarıhyn, halyq ertegileri men dástúrlerin zerttegenin jasyrmady. Sondyqtan kilem betine túsken ár boıaý, ár syzyq, ár keskin tarıhqa negizdelgen dep aıtýǵa bolady.
Otandyq sýretshiniń 15 kilemnen turatyn toptamasy bar. Olarda Kók bóri, Umaı, Aıbıke batyr, Saq patshaıymy, Rábııa sultan, Bopaı, Aıǵanym, Súıimbıke, Gaýhar batyr, Qurmanjan Datqa, Aıtolqyn batyr jáne basqa da Uly dalanyń kórnekti áıelderiniń obrazdary beınelengen.
Ásel Sabyrjanqyzy jas býyn tarıhta óz izin qaldyrǵan uly áıelderdi este saqtap, bilýi kerek dep sanaıdy.
«Qazaq áıelderi memleketti basqardy, saıasatpen aınalysty, aǵalarymen, kúıeýlerimen jáne ákelerimen teń dárejede shaıqasty. Kilemge túsken kez kelgen keıipker týraly tyń derek bar. Sol derekterdi barynsha saqtaýymyz kerek. Qazaq áıelderiniń erendigi men úlesi elenip, umyt bolmaýy qajet», deıdi tyń týyndylardyń avtory.