Grýzııa eliniń bas shahary Tbılısıde shpagamen semserlesýden álem kýbogi kezeńi ótedi. Ulttyq olımpıadalyq komıtet málim etkendeı, atalǵan kezeńde 60-tan astam elden jınalǵan sportshylar reıtıngtik upaı men Olımpıada joldamasy úshin tartysady, dep habarlaıdy Egemen.kz.
Qazaqstan sapynan qatysatyn 12 sportshynyń ishinen tórt sportshy joldamaǵa talasady. Olar: Rýslan Qurbanov, Elmır Álimjanov, Erlik Sertaı, Vadım Sharlaımov tórttigi.
Naýryzdyń 22-23 kúnderi shpagadan jekeleı syn boıynsha jeńimpazdar anyqtalsa, 24 naýryzda komandalyq jarystan Olımpıada joldamasynyń taǵdyry sheshiledi.
Atalǵan álem kýbogi kezeńinde otandastarymyz lısenzııaǵa qol jetkizetin bolsa, Qazaqstanǵa Parıj Olımpıadasynyń tórt joldamasy beriledi. Onyń úsheýi jekeleı synǵa, bireýi tutas komandaǵa tabystalady.