Maıqaıyńnyń altyn kenishindegi apattyq jaǵdaıdan keıin toqtap qalǵan shahtanyń jumysy áli kúnge qańtarylyp tur. Al kásiporyn boıynsha 260-qa jýyq qyzmetker májbúrli demalysta. Qazirgi ýaqytta jurt arasynda «Maıqaıyńaltyn» kásiporny bankrot bolyp, taratylady eken degen áńgime jeldeı esip tur.
Buǵan deıin D.Qonaev atyndaǵy taý-ken isi ınstıtýtynyń mamandary «Maıqaıyńaltyn» AQ-nyń kenish shahtalaryna túsip, olardyń kenshiler úshin qanshalyqty qaýipsiz ekenin tekserip jatqany týraly habarlaǵan edik. Mamandar oń sheshim shyǵarsa, sáýir aıynda kenish qaıtadan jumysyn jalǵastyrýy kerek edi. Alaıda ınstıtýt ǵalymdary ázirshe kenishtiń jaǵdaıyn baǵalaý boıynsha qorytyndylaryn taǵy bir sozatynǵa uqsaıdy.
Bul eki arada altyn kásipornynda eńbek etetin myńǵa jýyq qyzmetkerlerdiń arasynda «shahta tolyǵymen toqtaıdy eken», «Maıqaıyńaltyn» bankrot bolady eken» degen alyp-qashpa áńgime jeldeı esip tur.
Maıqaıyńdyq turǵyndardyń bul aıtyp júrgenderiniń shyndyqqa qanshalyqty janasatynyna kóz jetkizbek oımen, kásiporynnyń bas dırektory Qýanysh Botınnen qalyptasqan ahýaldy surap bildik.
– «Maıqaıyńaltyn» AQ-nyń basshysy retinde bul aqparattyń shyndyqqa janaspaıtyn qaýeset ekenine sendire alamyn. Aksıonerlerimiz shahta jumysynyń jalǵasýyna, adamdarymyzdyń óz jumys oryndaryna oralyp, kombınattyń tolyqqandy sıklge kóshýine múddeli. Bul máselede olardyń tarapynan durys ári ádiletti kózqaras bar. Kásiporyn toqtamaıdy, ony ári qaraı damytý úshin aksıonerlerimiz qosymsha qarjy quıýǵa beıil tanytyp otyr. Qazirgi ýaqytta «Maıqaıyńaltyn» AQ-nyń kenishindegi apatty tergep-tekserý sharalary áli de jalǵasyp jatyr. Bul is-sharalar shamamen 31 naýryzda aıaqtalyp qalady degen úmit bolǵan edi. Biraq quzyrly jáne quqyq qorǵaý organdary áli de biraz ýaqyt jumys isteıtinge uqsaıdy. Qonaev atyndaǵy taý-ken isi ınstıtýtynyń mamandary shahtalarymyzǵa túsip, olardyń qyzmetkerlerimiz úshin qanshalyqty qaýipsiz ekenin baǵalaý ústinde. Negizi bul zertteýdiń túıini de 31 naýryzda qoıylyp, oń sheshim shyqsa shahtadaǵy óndiris jumystary iske qosylady dep úmittengenbiz. Biraq ınstıtýt ókilderi bizge asyqpaýdy eskertti. Barlyǵyn jiti zerttep shyqpaqshy. Árıne, biz úshin qyzmetkerlerimizdiń qaýipsizdiginen mańyzdy másele joq. Sondyqtan zertteýdi jerine jetkizýge kelistik. Mamandar barlyq jaıtty nazarǵa alyp, qaýipsizdikti qamtamasyz etetin esepteýlerin júrgizip jatyr, – dep jaýap berdi óndiris ornynyń basshysy.
Belgili bolǵandaı, qazir ken baıytý kombınaty men ózge qurylymdyq bólimshelerde jalpy sany 580 adam jumys istep jatyr. Al jumysy shahtamen baılanysty 260 qyzmetker májbúrli eńbek demalysynda. Olarǵa aılyq eńbekaqysynyń 50 paıyzy mólsherinde jalaqy tólenip otyr.
Kásiporyn basshylyǵy jerastyna túsip ketken avtobýs ishindegi arystaı qos azamatty izdeýdi jalǵastyrýy múmkin be? Ol másele áli kúnge basy ashyq kúıinde tur. Qazir apat oryn alǵan jerdiń aınalasy qorshalyp, barlyq jumys toqtatylǵan.
Pavlodar oblysy