Qazaqstannyń soltústik pen batys aımaqtaryn sý basyp jatsa, ońtústiginde qurǵaqshylyq baıqalady. Túrkistan oblysyndaǵy Keles aýdanynyń dıqanshylary eginsiz qalýdan qorqyp otyr, dep habarlaıdy Egemen.kz KTK arnasyna silteme jasap.
Keles óńiriniń dıqanshylary jýyq arada egilgen qyryqqabattyń qazirdiń ózinde qýrap qalǵanyna alańdaýly. Al jaqyn arada sýarylmasa, eginniń shyqpaı qalýynan qorqyp otyr.
«Qazir bizdiń egistikterde sýaratyn eshteńe joq. Qarańdar, bári qurǵap jatyr. Qyryqqabat pen qyzylsha qara bolyp ketti. Sýarý máselesi boıynsha sý basqarmasyna habarlastyq, biraq olar kómektese almady. Endigi úmit jańbyrdyń jaýýy, ol egindi saqtap qalýy múmkin», deıdi dıqanshy Nurseıit Ryspaev.
Sheneýnikter halyqty úmit úzbeýge shaqyrdy. Aýdanǵa sýarmaly sýdyń bir bóligi kanal arqyly О́zbekstannan keletini anyqtaldy. Degenmen ol jaramsyz, sondyqtan biraz ýaqytqa sý sóndirildi.
«STK kanalynda apattyq jaǵdaı týyndady. Biz sýarý basqarmasyn shaqyrdyq, qazir jóndeý jumystaryn júrgizip jatyrmyz. Olar eki-úsh kúnde aıaqtalady. Qolymyzdan kelgenniń bárin jasap jatyrmyz. Jaqyn arada sý keledi», dedi Keles aýdanynyń ákimi Súleımen Jylqybaev.
Eske sala keteıik, buǵan deıin Tótenshe jaǵdaılar mınıstrligi sý tasqyny aımaǵynda bes oblys qalǵanyn, ákimdikter 20 jergilikti tótenshe jaǵdaı jarııalaǵanyn habarlaǵan bolatyn. Aqtóbe, Batys Qazaqstan jáne Qostanaı oblystarynda jaǵdaı kúrdeli.
Qyrmyzy JUMAǴALIQYZY,
EUÝ stýdenti