Búgingi sot otyrysynda prokýror Aıjan Aımaǵanova aıyptalýshy Qýandyq Bıshimbaevtan tolyq jaýap alý maqsatynda iske qatysty barlyq beınejazbalardy qaraýdy surady.
«Bıshimbaev sot aldynda kýálik berý kezinde ózin áıelin qatty súıetin, áıeli aıtqannyń barlyǵyn oryndaıtyn qamqor er azamat retinde kórsetti. Endeshe, onyń 8 qarashada qalaı «qamqorlyq» kórsetkenin kóreıik», dedi memlekettik aıyptaýshy.
Osy oraıda prokýror Núkenovanyń jeke telefonyn paıdalanýdy usyndy. Zattaı dáleldemege Saltanattyń qurbysynyń uıaly telefony da jatatynyn aıta ketý kerek, onda uryp-soǵý týraly derekter saqtalǵan.
Aıtbek Amangeldi vıdeodan alynǵan keıbir kadrlardy tikeleı efırde kórsetpeýdi usyndy, onyń aıtýynsha, tikeleı efırdi eresekter ǵana emes, balalar da kórýi múmkin.
Sýdıa aıyptaýshy taraptyń ótinishterin qanaǵattandyrdy. Sot jábirlenýshi taraptyń pikirin de qoldady. Iske qatysty fotosýretter men vıdeomaterıaldar tek alqabı quramyna ǵana kórsetiledi.
Bıshimbaev aıyptaýshy taraptyń ótinishi týraly pikir bildirip, fotomaterıaldardy tikeleı efırde kórsetýge bolatynyn aıtty. kórsetýge bolatynyn aıtty.
«Vranchev myrza (advokat) dene jaraqattary beınelengen sýretterdi kórsetkisi kelmeıtinin aıtyp otyr, al men kerisinshe bolǵanyn qalaımyn. Internette Saltanattyń dene jaraqattaryna qatysty jalǵan aqparattar tarap júr. Men bul sýretterdi alqabıler de, qoǵam da kórgenin qalaımyn. Sebebi qazirgi ýaqytqa deıin aıtylǵannyń barlyǵy shyndyqqa janaspaıdy», dedi sottalýshy.
Sýdıa Aıjan Qulbaeva Bıshimbaevtyń bul pikirine: «Atalǵan is boıynsha sheshimdi qoǵam emes, alqabıler alqasy qabyldaıtynyn eske salǵym keledi», dep jaýap berdi.