Tórt jyldyqtyń basty dodasy – Parıj Olımpıadasyna sanaýly aılar qaldy. Ulttyq qurama sportshylary lısenzııalyq týrnırler men reıtıngtik dodalarǵa qatysyp, qorjyndy meılinshe kóp joldamamen tolyqtyrýǵa nıetti. Al basty básekege lısenzııa alyp qoıǵan otandastarymyz jeke baǵdarlama boıynsha sheberlikterin shyńdap, mańyzdy jarysqa tyńǵylyqty daıyndalyp jatyr, dep jazady Egemen.kz.
Ulttyq qurama sapynan Parıj Olımpıadasyna lısenzııa jeńip alǵandardyń biri – bokstan áıelder quramasy ókili Karına Ibragımova. Ol byltyr Qytaıdyń Hanchjoý qalasynda ótken Azııa oıyndarynda kúmis júlde enshilep, Olımpıada lısenzııasyna ıe boldy. Týrızm jáne sport mınıstrliginiń baspasóz qyzmetiniń málim etýinshe Karına Ibragımova sportpen 2012 jyldan beri shuǵyldanady. О́ziniń aıtýynsha, ol sportqa kezdeısoq kelgen. Ákesi bokstyń úlken jankúıeri edi jáne Ibragımovter áýletiniń dosy bokstan jattyqtyrýshy bolatyn. Ony ákesi men dosy alty aı boıy bokspen shuǵyldanýǵa úgittegen. Osylaısha, Karınanyń alǵashqy jattyqtyrýshysy jáne tálimgeri ákesiniń dosy boldy. «Men bar bolǵany ákemniń kóńili toq bolý úshin boksqa barýǵa sheshim qabyldadym. Sol kezde aýylda turatynbyz. Bapkerim boks – olımpıadalyq sport ekenin aıtqan kezde «qaıdaǵy Olımpıada?» dep oıladym. Men jáne Olımpııa oıyny – aspan men jer sııaqty kórindi», deıdi boksshy. Jeke tálimgeri Aleksandr Vysoskııdiń aıtýynsha, Karına ózgelerdiń arasynda tártibimen, eńbekqorlyǵymen erekshelenip turady. Bapker qoıǵan barlyq tapsyrma men maqsattardy barynsha oryndaıdy.
Karına Ibragımova – Qazaqstannyń eńbek sińirgen sport sheberi, álem chempıonattarynyń úsh dúrkin júldegeri (2018, 2022, 2023), Azııa oıyndarynyń kúmis júldegeri (2023), Azııa chempıony (2022), halyqaralyq jáne ishki týrnırlerdiń birneshe dúrkin jeńimpazy jáne júldegeri. Jeke jattyqtyrýshysynyń aıtýynsha boksshy jarysqa naǵyz babynda barýy úshin Olımpııa oıyndaryna deıin keminde 8 jekpe-jek ótkizýi qajet. «Parıj Olımpıadasyna deıin jarys sátin, atmosferasyn seziný úshin mindetti túrde 1-2 týrnırge qatysýdy josparlap otyrmyz. О́ıtkeni jattyǵýdyń, sparrıng jasaýdyń, jarysqa qatysýdyń jóni bólek», deıdi Karına Ibragımova.