2023 jyly elimizge 1 084,8 myń sheteldik týrıst saıahattaǵan. Bul – bir jyl burynǵy kórsetkishke qaraǵanda 156,8 myń adamǵa kóp, ósim 2022 jylmen salystyrǵanda 17%-ǵa jetti. 2022 jyly elimizge 928 myń sheteldik kelgen, dep habarlaıdy Egemen.kz Týrızm jáne sport mınıstrliginiń baspasóz qyzmetine silteme jasap.
Byltyrǵy jyldyń qorytyndysy boıynsha, ornalastyrý oryndary qyzmet kórsetken ishki týrıster sany 2022 jyldyń sáıkes kezeńimen salystyrǵanda 647,5 myń adamǵa artyp, 7 mln 54,5 myń adamǵa jetti. Bul kórsetkish pandemııaǵa deıingi kezeńmen salystyrǵanda 1 mln 767 myń adamǵa kóp (2019 jyly – 5 mln 286 myń adam).
«Keıingi jyldary álemniń túkpir-túkpirinen kelgen týrıster arasynda Qazaqstanǵa degen qyzyǵýshylyqtyń arta bastaǵany baıqalady. Máselen, bıyl elimizge 1 mıllıonnan astam sheteldik kelgen. Bul elimizdiń tabıǵı sulýlyǵy, mádenı baı muramyz ben qonaqjaılyǵymyz kórse kóz toıatyndaı ekenine dálel bolyp tur. Biz jańa qonaqúıler salýdy, kólik jelisin damytýdy jáne týrıstik marshrýttardy keńeıtýdi qosa alǵanda, týrızm ınfraqurylymyn belsendi damytyp jatyrmyz. Maqsatymyz – Qazaqstandaǵy saıahatty kelýshiler úshin qoljetimdi ári jaıly etý. Elge kelgen ár adam biregeı múmkindikterimizdi paıdalanyp, esten ketpes sátterdi bastan ótkerse eken deımiz», dedi Týrızm jáne sport mınıstriniń orynbasary Erjan Erkinbaev.