Atyraý oblysynda Jem ózenindegi jasandy bógetterdi buzý jumystary júrip jatyr.
Jylyoı aýdanynyń ortalyǵy – Qulsarynyń turǵyn úıleri men áleýmettik nysandary sý ortasynda tur. Monoqalaǵa tasqyn sý Jem ózeninen keldi.
Atyraý oblysy ákiminiń orynbasary Qaırat Nurtaevtyń aıtýynsha, Jem ózeninen eldi mekenderge tónetin qaýipti seıiltý úshin bógetterdi buzý qolǵa alynǵan.
«Jylyoı aýdanynyń aýmaǵynda Jem ózeniniń saǵalaryn ashyp jatyrmyz. Bul mańda kezinde kóptegen sharýa qojalyǵy sýdy jınap alý maqsatynda aǵys kózin bitegen. Jasandy bógetter turǵyzylǵan. Bul Jem ózeniniń óz arnasymen aǵyp ketýine úlken kedergi keltirip otyr. Sol sebepten bitelgen saǵalardy ashý úshin jasandy bógetterdi buzý qolǵa alyndy», dep habarlady Qaırat Nurtaev.