Qazaq biliminiń qara shańyraǵy – Abaı atyndaǵy QazUPÝ akademııalyq jetistikterdi arttyrý jáne ǵylymı talanttardy yntalandyrý maqsatynda alǵash ret «Abaı» stıpendııasyn iske qosty. Ýnıversıtet rektory Bolat Tileptiń bastamasymen qolǵa alynǵan jańa baǵdarlama qarjylyq qoldaýmen qatar stýdentterdi akademııalyq jetistikke jetýge yntalandyrady.
«Abaı» stıpendııasynyń maqsaty – Abaı ýnıversıtetiniń daryndy stýdentterin qoldaý, olardyń ıntellektýaldyq, ǵylymı-zertteý áleýetin qalyptastyrý jáne oqý-tanymdyq qyzmetin yntalandyrý.
Memlekettik bilim berý tapsyrysy boıynsha jáne aqyly negizde oqıtyn 2-4 kýrs stýdentteri endi jańa bilimge, ǵylymı-zertteý jumystaryna degen umtylystaryn kórsetýge múmkindik aldy. Ataýly stıpendııanyń ıegeri bolý úshin ótken oqý kezeńderinde stýdenttiń oqý úlgerimi tek «óte jaqsy» (A, A -) bolýy kerek. Alaıda, bul irikteý talaptaryndaǵy jalǵyz krıterıı emes. Prezıdenttik stıpendııa alatyn stýdentter «Abaı» stıpendııasyna úmitker bola almaıdy.
Úmitkerlerdi anyqtaý eki kezeńnen turady. Irikteý úrdisi úmitkerlerden tek akademııalyq sheberlikti, akademııalyq adaldyqty ǵana emes, sonymen qatar olardyń ǵylymı zertteýlerin kórsetýdi talap etedi. Konkýrstyń ekinshi kezeńinde qatysýshylar Ǵylym dekadasy aıasynda ǵylymı-zertteý jumystary boıynsha baıandamalar jasaýy tıis. Bul stýdentterge ózderiniń ǵylymı qabiletterin kórsetýge jáne belsendi ǵylymı qoǵamdastyqtyń bir bóligi bolýǵa múmkindik beredi.
Usynylǵan jumystardy talqylap, baǵalaǵannan keıin jeńimpazdar ár ınstıtýt/fakýltet usynǵan kvotaǵa sáıkes anyqtalady. Bul úrdis úzdikterdi tańdaýda ádildik pen ashyqtyqqa kepildik beredi. Eńbegi men talanty tanylǵan stýdentter úshin «Abaı» stıpendııasy jańa múmkindikterge jol ashady. Aı saıynǵy 100 000 teńge stýdentterdiń ǵylymı izdenisterin qoldaýǵa baǵyttalǵan.
Ýnıversıtette «Abaı» stıpendııasynyń engizilýi – bilim salasyn damytýdaǵy jaı ǵana qadam emes, jas urpaqty ǵylymǵa, bilimge yntalandyrý, osy saladaǵy akademııalyq jańa belesterdi tabysty baǵyndyrýǵa shaqyrý. Olardy dál osylaı qoldaý – keleshekterin sátti qalyptastyrýǵa yqpalyn tıgizeri anyq.
ALMATY