Qazaqstan Respýblıkasy Parlamenti Senatynyń Tóraǵasy Máýlen Áshimbaev Oraza aıt merekesine oraı Facebook jáne Instagram áleýmettik jelilerinde jazba qaldyrdy, dep habarlaıdy Egemen.kz.
«Qurmetti dostar! Barshańyzdy Oraza aıt merekesimen shyn júrekten quttyqtaımyn!
Ramazan aıynyń aıaqtalǵanyn bildiretin bul meıram – kúlli musylman qaýymy úshin qasterli.
Aıt kúnderi meıirimdilik, janashyrlyq, qamqorlyq sııaqty izgi qundylyqtardyń mańyzy eselene túsedi. Adamdar bir-birine kómek qolyn sozyp, qasıetti aıdy ıgi istermen jalǵastyrady. Mundaı úrdis eldiń bereke-birligin arttyratyny anyq.
Bıylǵy Oraza aıt elimiz úshin úlken synaqpen qatar kelip otyr. Osyndaı syn-saǵatta halqymyz qaıyrymdylyq tanytyp, tasqynnan zardap shekken óńirlerdiń turǵyndaryna qoldaý bildirip, aýyzbirshiliktiń ozyq úlgisin kórsetip otyr. Bul – ımandylyq pen adamgershiliktiń jarqyn kórinisi.
Qazirgi tańda memleket tarapynan da tabıǵı apattyń saldaryn joıý úshin barlyq jaǵdaı jasalyp jatyr. Azamattarymyzdyń bekem birligi men parasatynyń arqasynda kóp uzamaı bul synaqty da eńseremiz dep senemiz.
Ulyq merekemen quttyqtaı otyryp, barshańyzǵa zor densaýlyq, ár otbasyna amandyq jáne elimizge tynyshtyq tileımin!
Aıttan aıtqa aman-esen jete bereıik!», dep jazdy Máýlen Áshimbaev quttyqtaý habarlamasynda.