Elimizdegi sý tasqyny saldarynan aýyr jaǵdaıǵa túsken azamattarǵa kómek kórsetý maqsatynda Kusto Group 400 mln teńge bólgeni týraly málimdedi. Zardap shekken aımaqtarǵa qarajat KustoHelp jeke qory arqyly bólinedi.
«Tabıǵı apattan zardap shekken otandastarymyzǵa janashyrlyq pen qoldaý bildiremiz. El basshylyǵy, quzyretti memlekettik organdar, eriktiler men azamattar adam qurbandaryn toqtatý men aldyn alý, zardap shekkenderge kómek kórsetý jáne sý tasqynynyń saldaryn joıý úshin qoldan kelgenniń bárin jasap jatyr. Biz osy jumysqa qosylamyz jáne apattan zardap shekken otandastarǵa barynsha kómek kórsetemiz», dedi Kusto Group negizin qalaýshy Erkin Tátishev.
Oraıy kelip turǵanda, Kustohelp qaıyrymdylyq qoryn Kusto Group halyqaralyq kompanııasy qurǵanyn aıta ketý kerek. Qor Qazaqstan Respýblıkasynda covid-19 koronavırýs pandemııasy sebebinen jarııalanǵan tótenshe jaǵdaı kezeńinde halyqtyń barynsha zardap shekken jáne osal toptaryna 1 mlrd teńgeden astam kólemde qarjylyq kómek kórsetti.