О́tken jyly Almaty qalasynyń turǵyny Aıdyn Boranbaevtyń ústine qaraǵash qulap túsken. Sol sátte ol óz velosıpedin turaqqa qoıyp turǵan edi. Aqyry aýyr dene jaraqattaryn alǵan er adam jumysyn jalǵastyra almaı, qyzmetten ketýge májbúr bolǵan. Keleńsiz oqıǵadan beri 9 aı ótti, al kináliler áli tabylmady, dep habarlaıdy Egemen.kz.
«Jumys kúni aıaqtalǵannan keıin nysannan birge shyqqan áriptesimmen aǵashtyń janynda qoshtasyp turdym. Ol ary qaraı ketti. Al men velosıpedpen úıge qaıtpaqshy boldym, sol kezde aǵashtyń synǵanyna uqsas dybys estidim. Joǵaryǵa qaraǵan mezette ústime aǵash dińi tústi», dedi jábirlenýshi KTK telearnasyna bergen suhbatynda.
Zardap shekken 36 jastaǵy er adam qurylys alańynda jumys istegen. Alaıda bul oqıǵadan keıin ol jumysynan aıyrylyp qalǵan. Sebebi onyń bas súıegi jarylyp, mıy shaıqalǵan. Dárigerlerdiń aıtýynsha, onyń bir omyrtqasy da synǵan. Otbasynda jalǵyz ózi jumys istegen er adam áıeli men eki balasyn asyraı almaı otyr.
«Qarajatsyz qaldyq, qaryzdanyp júrmin. Barlyq nesıelerdiń merzimi ótip ketken. Jalǵa alǵan eki bólmeli páterden kóshýge týra keldi», dedi Aıdyn Boranbaev.
Ol bul másele boıynsha aýdan ákimdigine júgingenin tilge tıek etti. Oqıǵa bolǵan jerdegi aǵashtar JOO aýmaǵynda ósip turǵany anyqtaldy. Tıisinshe, bul aǵashtarǵa JOO ákimshiligi jaýapty.
Zardap shegýshiniń zańgeri Jandos Nııazalıev JOO basshylyǵy kinálilerdi izdemegenin, tıisti kómek kórsetpegenin aıtty.
Aıta ketsek, keleńsiz oqıǵa ótken jyldyń 20 maýsymynda agrarlyq ýnıversıtet aýmaǵynda bolǵan. Tótenshe jaǵdaıdan keıin aǵash ishinara kesildi, biraq butaqtardyń bir bóligi áli kúnge deıin kóshe ústinde ilinip tur.
JOO prorektory zardap shekken er adam týraly keshe ǵana bilgenin alǵa tartty. Onyń aıtýynsha, ýnıversıtet óz aǵashtaryna jaýap berse de, olardy óz erkimen kese almaıdy, bul ispen tender jeńip alǵan kompanııa aınalasýy kerek.