Sý resýrstary jáne ırrıgasııa mınıstrligi el óńirlerinde tasqyn sýy qalaı paıdalanyp jatqany týraly aqparat usyndy, dep habarlaıdy Egemen.kz.
Atyraý oblysy boıynsha «Qazsýshar» fılıaly Jaıyq ózeninen Kaspıı teńizine tasqyn sýdy qaıta baǵyttaý úshin 14,5 shaqyrym qosymsha arnalar qazyp jatyr. Bul sondaı-aq Atyraý qalasy arqyly ótetin sýdyń kólemin azaıtýǵa múmkindik beredi.
Batys Qazaqstan oblysy boıynsha «Qazsýshar» fılıaly Oral-Kóshim sýlandyrý júıesinen Qamys-Samar kólderine sý aǵyzýǵa kiristi. Bul kólderge sońǵy 20 jylda sý túspegen eken.
2000 jyldan keıin osy jyly ǵana Tobyl ózeninde sý molaıdy. Tobyl ózeni kaskadynyń iri sý qoımalary tasqyn sýlardy qaýipsiz ótkizýdi qamtamasyz etti jáne 92 paıyzǵa toldy. Osynyń arqasynda sý qoımalary óńir turǵyndaryn uzaq merzimge qajetti kólemde sýmen qamtamasyz etýge qabiletti.
Astana sý qoımasyn toltyrý elorda turǵyndaryn jyl boıy aýyzsýmen qamtamasyz etýge múmkindik beredi. Astana sý qoımasyndaǵy ótken jylǵy sý kólemi qalany aýyzsýmen tolyq kólemde qamtamasyz etýge múmkindik bermegen, sonyń saldarynan Q.Sátpaev atyndaǵy kanal arqyly sý qoımasyn qorektendirýge týra kelgen. Atalǵan úderis shyǵynǵa batyp, 2 mıllıard teńgeden asqan.
Aqmola oblysynda «Alva» jáne «Keńbıdaıyq» lımandy sýarý júıeleri 100 paıyzǵa toldy. Sondaı-aq Selınograd aýdanynyń Qozykósh, Muqyr, Qarasý ózenderiniń arnalary tolyqty. Qorǵaljyn qoryǵynyń Teńiz kóline 1,5 mıllıard tekshe metr sý jiberildi.
Batys Qazaqstan oblysynda Jaıyq ózeninen bir tekshe shaqyrymǵa jýyq sýdy qabyldaýǵa qabiletti Jaıyq-Kóshim lımandy sýarý júıesine sý jiberý múmkindigi paıda boldy.
Qaraǵandy oblysynyń sý qoımalary da 100 paıyzǵa toly. Olarda jınalǵan sý jyl boıy óńir ekonomıkasynyń qajettiligin tolyq qanaǵattandyrýǵa múmkindik beredi.
«Ulytaý oblysyndaǵy Keńgir sý qoımasynan aǵyzylǵan sý alǵash ret Sarysý ózeni arqyly Qyzylorda oblysynyń kólderine quıyldy. Qyzylorda oblysynyń Telıkól kólder júıesiniń belsendi toltyrylýy baıqalady, bul óńirdiń aýyl sharýashylyǵyna qolaıly áser etýi tıis», dep atap ótti mınıstrlik.
Ekologııalyq maqsatta Jambyl oblysynyń Tasótkel sý qoımasynan sý Shý ózeni arqyly aǵyzylady. Sáýirdiń basynda bul sý Túrkistan oblysy Sozaq aýdanynyń shekarasyn kesip ótti. Tasótkel sý qoımasynan sý jiberý 1 mamyrǵa deıin jalǵasady, osy ýaqyt ishinde Shý ózeni arqyly Sozaq aýdanyna mıllıon tekshe metrge jýyq sý quıylýy tıis.
10 sáýirden bastap Ertis ózeni sý qoımalarynyń kaskadynan tabıǵatty qorǵaý maqsatynda sý jiberý júzege asyrylady. Bul Pavlodar oblysynyń aýyl sharýashylyǵyn qajetti azyqtyq bazamen qamtamasyz etýge múmkindik beredi.
Jalpy sý qoımalarynan 6,3 mıllıard tekshe metr sý aǵyzý josparlanyp otyr.