«Barmysyń, baýyrym?» habarynyń redaksııasy Jánibek Savelevtiń oqıǵasyna baılanysty sońǵy jańalyqtardy bólisti. Baǵdarlama avtory Qymbat Dosjan Jánibektiń asyrap alǵan anasy Valerımen túsirgen suhbat-vıdeosynan keıin jeli qoldanýshylary tarapynan suraqtar jıilep ketkenin aıtty, dep jazady Egemen.kz.
Jeli qoldanýshylary osy jazbadan keıin «aqsha alǵan adam, áıeldiń esimi, onyń nemen aınalysatyny, jasy belgili eken, onda nege Jánibektiń anasy tabylmaı jatyr» degen mazmundaǵy saýaldaryn qarsha boratqan.
Qymbat Dosjan bul málimetter osy jyldyń basynda, 7 qańtarda anyq bolǵanyn aıtty. Redaksııa mundaı aqparatty Jánibekti asyrap alǵan Valerıden bilgen. Qazir oqıǵaǵa qatysty qylmystyq isti Arqalyq oblystyq Polısııa departamenti tergep jatyr. Sáıkesinshe, Valerıden aqsha alǵan áıel de tergep-tekserilip jatyr. Jýrnalıst tergeý múddesine saı basqa málimetti jarııalaýǵa quqy joq ekenin aıtty.
«Ol áıel 2004 jyly aqsha alǵan kezde Arqalyqta jumys istegen. Alaıda barlyqtaryńyz oılaǵandaı perzanthanada ne balalar úıinde jumys istemegen. Til biletindikten aýdarmashy bolǵan. 12 myń doollardy qolynan sanap alǵanda Jánibekti asyrap alǵan anasyna «siz az berip tursyz, amerıkalyqtar ul balaǵa 20 myń dollar beredi» dep aıtqanyn Valerıden estidik», dedi Qymbat Dosjan.