Atyraý oblysynda Jaıyq ózenindegi sý deńgeıi kún saıyn kóterilip keledi. Búgin Mahambet aýdanynda 7 metr 28 santımetrge jetti.
Atyraý oblysynyń jedel shtaby «Qazgıdromet» RMK Atyraý oblystyq fılıalynyń gıdrologııalyq monıtorıng deregin jarııa etti. Sol derekke súıensek, ózen deńgeıi Batys Qazaqstan oblysynyń aýmaǵynan keletin sý esebinen ózgeredi.
Máselen, búgin, 26 sáýirde saǵat 08:00-de Inderbor kentindegi gıdrobekette Jaıyq ózenindegi sý deńgeıi +9 santımetrge kóterilip, 613 sm quraǵan. Inder aýdanynda sý tasqyny bastalǵaly beri ózen deńgeıi 390 santımetrge kóterilgeni anyqtalǵan.
Al Mahambet aýylyndaǵy bekette sý deńgeıi 728 santımetrge jetip otyr. Munda sý bir táýlikte +7 sm kóterilgen. Jalpy kóterilý deńgeıi – 411 santımetr.
Jaıyq ózeniniń deńgeıiniń kóterilgeni Atyraý qalasyndaǵy gıdrobekette de baıqalady. Bul bekette sý aıdyny +3 santımetrge kóterilip, 428 santımetrdi qurady. Shahar aýmaǵynda sý tasqyny bastalǵan kezden bergi kóterilý kórsetkishi 237 santımetrge jetken.