Premer-mınıstrdiń orynbasary Tamara Dúısenova sý tasqynynan zardap shekken azamattardy áleýmettik qoldaý boıynsha memleket qabyldap jatqan sharalar týraly aıtty.
«Memlekettiń halyq aldyndaǵy áleýmettik mindetteri tolyq ári ýaqtyly oryndalyp jatyr. Zardap shekken aımaqtardyń turǵyndaryna áleýmettik tólemder bekitilgen merzimnen buryn berilýde. Mundaı rejim bıylǵy 1 qyrkúıekke deıin saqtalatyn bolady. Odan bólek, múgedektigi bar azamattardy qaıta kýálandyrý men birinshi toqsanda ataýly áleýmettik kómekti alyp júrgender úshin qaıta taǵaıyndaý merzimderi 1 shildege deıin avtomatty túrde uzartyldy», dep atap ótti T.Dúısenova.
Vıse-premer tasqynnan zardap shekken azamattardyń turǵyn úı máselesin sheshý týraly da aıtty. Sý tasqyny saldarynan úıleri nemese saıajaılary (jalǵyz turǵyn úıi) qalpyna keltirý múmkin bolmaı qalǵan azamattar úshin máseleni sheshýdiń eki joly usynylǵan. Ol – jańa úı salý nemese О́nerkásip jáne qurylys mınıstrligi bekitken shekti soma aıasynda azamattardyń tańdaýyna saı ekinshi naryqtan daıyn baspana satyp alý.
«Tasqyn sýdan zardap shekkenderdiń barlyǵyna 100 aılyq eseptik kórsetkish kóleminde birjolǵy tólem qarastyrylǵan. Búginde ol 11 myńnan asa otbasyǵa tólengen. Úkimet azamattarǵa búlingen úı zattaryn alý úshin qosymsha 150 AEK-ke deıingi mólsherde kómek kórsetý týraly sheshim qabyldady», dep atap ótti T.Dúısenova.
Aıta keteıik, bul qosymsha kómek búlingen úı zattaryn (tońazytqysh, as úı plıtasy, ústel, oryndyq, kereýet, kir jýǵysh mashına, teledıdar nemese radıo, sýmen jabdyqtaý jáne jylytý quraldary) satyp alýdy qarjylandyrý nemese shuǵyl qajettiligi bar taýarlardy usyný túrinde kórsetiledi.
Odan bólek, ótelmegen nesıesi bar azamattarǵa bankter men mıkroqarjy uıymdary 1 sáýirden bastap 30 maýsymǵa deıingi aralyqta bereshekti óteý merzimin uzartýdy qarastyrýda. Atalǵan kezeńde zardap shekkenderge aıyppuldar men ósimpuldar eseptelmeıdi. Mundaı shara jeke kásipkerler, shaǵyn jáne orta bıznes ókilderine de usynylady. Aımaq ákimdikteri 5 myńnan asa azamattyń jáne 110-nan asa bıznes sýbektileriniń tizimin jasaǵan.
Sonymen qatar evakýasııalyq ortalyqtarda bolǵan 4 myńnan asa bala saýyqtyrý lagerlerine, kolledjder men joǵary oqý oryndarynyń jataqhanalaryna, Nazarbaev zııatkerlik mektepteri, Bilim ınnovasııa lıseıleriniń ınternattaryna ornalastyryldy. Onda turýǵa, tamaqtanýǵa jáne oqýǵa qajetti jaǵdaı jasalǵan. Olar munda úıleri qalpyna keltirilip, mektepterinde oqý úderisi qaıta jalǵasqanǵa deıin bolady.
«Búginde 500-den asa bala áli de evakýasııalyq ortalyqtarda qalyp otyr. Olar da bilim berý úrdisimen qamtylǵan. Olardyń ata-analary tasqyn sýdyń ketip, úılerine oralǵanyn nemese baspanalaryn qalpyna keltirý úshin baǵalaý júrgizilýin kútip júrgenin túsinemin. Bul sanattaǵy balalardyń ata-analaryna bizde balalardy ornalastyrýǵa qarastyrylǵan taǵy 4 myńnan asa oryn bar ekenin aıtqym keledi. Eger kelisimin berse, olardy sol jerlerge ornalastyrýǵa daıynbyz. Oqý maýsymy aıaqtalǵan soń ata-analardyń kelisimimen balalarǵa ózi turyp jatqan aımaqta, ne basqa óńirlerde ornalasqan jazǵy demalys lagerlerine barýyna múmkindik beriledi. Bul máselemen Oqý-aǵartý, joǵary bilim, týrızm jáne sport mınıstrleri tikeleı aınalysýda», dep atap ótti Premer-mınıstrdiń orynbasary.
Tamara Dúısenova sondaı-aq zardap shekken 6 aımaqtaǵy túlekter úshin ulttyq biryńǵaı test bólek kestemen ótkiziletinin jetkizdi. Talapkerler tómen ball alǵan jaǵdaıda bıylǵy jaǵdaıǵa baılanysty qańtar men naýryz aılaryndaǵy UBT-daǵy úzdik nátıje eskeriletin bolady. Odan bólek, qazir qosymsha nysanaly granttar bólý jaǵy qarastyrylyp jatyr.
Vıse-premer barlyq medısınalyq mekeme kúsheıtilgen rejimde jumys istep jatqanyn da atap ótti. Qazir qajetti dári-dármek qory ázirlengen. Epıdemııalyq brıgadalar qurylyp, japa shekken aımaqtardaǵy aýyz sý sapasy men erekshe qorǵalatyn aýmaqtar turaqty baqylaýǵa alynǵan. Búginde epıdemııalyq jaǵdaı turaqty dep baǵalanýda.