Jýyrda Mońǵolııa astanasy Ulanbatyr qalasynda Túrki Akademııasy jáne Mońǵolııa Ǵylym akademııasy Arheologııa ınstıtýtynyń birlesip uıymdastyrýymen «Nomǵon-2» ǵuryptyq kesheninen tabylǵan bitiktastyń tómengi bóliginiń tanystyrylymy ótti. Bul týraly Túrki Akademııasynyń baspasóz qyzmeti habarlady, dep jazady Egemen.kz.
Ulanbatyr qalasyndaǵy Shyńǵyshan murajaıynda ótken ǵylymı is-sharaǵa Túrki Akademııasynyń prezıdenti Shahın Mustafaev, Mońǵolııa Ǵylym akademııasynyń prezıdenti Dúgerıın Regdel, Qazaqstannyń Mońǵolııadaǵy elshisi Ǵabıt Qoıshybaev, Túrkııanyń Mońǵolııadaǵy elshiliginiń ýaqytsha senimdi ókili Alı Saıd Serdengechtı, sonymen qatar dıplomatııalyq mıssııa ókilderi, ınstıtýttardyń basshylary jáne basqa da belgili ǵalymdar qatysty.
Aıta ketý kerek, arheologtar Elteris Qutlyq qaǵanǵa tıesili dep boljap otyrǵan bitiktastyń joǵarǵy bóligi aldyńǵy jyly osy keshendegi qazba jumystary kezinde tabylǵan edi.
Onyń ekinshi bóligin izdeýge qatysqan ǵalymdardyń málimdeýinshe, bitiktastyń jańadan tabylǵan tómengi bóliginde kóne qytaı tilinde jazylǵan mátin anyqtalǵan.
Eskertkishtiń birshama búlingeni baıqalyp otyr.
Ǵalymdar bitiktastaǵy jazýlardy oqyp, zertteý jumystaryn júrgizip jatyr.
Osy alqapta Túrki Akademııasy júrgizgen arheologııalyq qazba jumystary barysynda 2019, 2022, 2023 jyldary maldas quryp otyrǵan qaǵannyń bádiz tasmúsini men músinniń bas bóligi tabylǵan edi. Sonymen qatar baýyrynda eki alany beınelengen arystan tas músini jáne 5 bádiz tas músinniń synyq bólshekteri anyqtalǵan.
Túrki Akademııasy men Mońǵolııa Ǵylym akademııasy Arheologııa ınstıtýty bolashaqta Nomǵon jazyǵynyń toǵyzynshy ǵuryptyq kesheninde arheologııalyq qazba jumystaryn jalǵastyrýdy josparlap otyr.