Atyraý qalasyndaǵy meıramhana ıesi belgili ánshi Qaırat Nurtasty sotqa berdi, dep habarlaıdy Egemen.kz.
AtyrauPress jazǵandaı, keshe atalǵan isti Almaty oblysynyń soty onlaın rejımde qaraǵan. Ánshi jańa jyldyq korporatıv keshinde óner kórsetýi tıis bolatyn.
Alaıda, uıymdastyrýshylar ánshiniń shamamen 5 mln teńge bolatyn shyǵystaryn jaba almaıtyndyqtan konsertti ótkizbeıtin bolyp sheshim qabyldap, bul jóninde ony 42 kún buryn eskertken.
Jábirlenýshiniń sózinshe, ol ánshiniń anasy Gúlzıra Aıdarbekovamen aýyzsha kelisken. Al 1000 dollar kólemindegi avans somasyn Almatyda ánshiniń ókilderine beripti.
«Konserttiń ótpeıtinin aıtqanymda menedjer aqshanyń qaıtarylmaıtynyn maǵan óte dóreki túrde jetkizdi. Keıin aýdıojazbalaryn óshirip tastady. Men ártisti sotqa berdim. Birinshi otyrysta jeńilip qaldyq, biraq men taǵy da shaǵymdandym. Sebebi, aqshamdy qaıtarǵym keledi», deıdi kásipker Olga Hvan.
Sot jábirlenýshiniń talabyn qanaǵattandyrmady. Endi ol Joǵary sotta alty aı ishinde sot sheshimine shaǵymdana alady.