Jyl basynan beri respýblıkada áleýmettik mańyzy bar ónimder baǵasynyń ósýi 0,2%-ǵa deıin baıaýlady, ótken aptada kórsetkish 0,1% quraǵan. Qazirgi baǵaǵa qatysty jaǵdaı Úkimette vıse-premer Serik Jumanǵarınniń tóraǵalyǵymen ótken kezekti keńeste qaraldy, dep habarlaıdy Egemen.kz Primeminister.kz saıtyna silteme jasap.
Bir apta ishinde qyryqqabat birden 10,4%-ǵa arzandady, oǵan Túrkistan oblysynda jańa ónim alý áser etken. Saýda jáne ıntegrasııa birinshi vıse-mınıstri Aıjan Bıjanova atap ótkendeı, qyryqqabatty satyp alýǵa saýda jelileri qosyldy, ishki naryq jappaı tolyǵyp jatyr.
Kúnbaǵys maıy (-0,6%), qaraqumyq jarmasy (-0,4%), S1 sanatyndaǵy taýyq jumyrtqasy (-1,4%) baǵasynyń tómendeýi baıqalyp jatyr. Sonymen qatar «tómen baǵalar» tobynda súzbe (-0,2%), taýyq eti (-0,2%), aıran - maılylyǵy 2,5% (-0,4%), tuz (-0,1%) jáne 1 surypty bıdaı uny (-0,1%) bar.
Aýyl sharýashylyǵy mınıstrligi tarapynan turaqtandyrý qorlaryndaǵy kókónis qorlarynyń kólemi boıynsha derekter aıtyldy. О́ńirlerge kúzgi ónimdi kelesi maýsymaralyq kezeńge jetkizýge forvardtyq sharttar jasasý boıynsha jumys júrgizý tapsyryldy.
Serik Jumanǵarın óńirlerge aldaǵy apta ishinde baǵany turaqtandyrýdy qamtamasyz etýdi jáne qajetti kólemde jańa ónim jetkizýdi jedeldetýdi tapsyrdy.