Túrkistan oblysynyń prokýratýrasy Túrkistan oblysynyń jumyspen qamtýdy úılestirý jáne áleýmettik baǵdarlamalar basqarmasynyń «Eńbek mobıldiligi ortalyǵynyń» qyzmetinde júıeli buzýshylyqtardy anyqtady, dep habarlaıdy Egemen.kz.
Oblys prokýratýrasy baspasóz qyzmetiniń habarlaýynsha, tekserý nátıjesinde ortalyq qyzmetinde 31 mıllıon teńgeden astam qarjy urlanǵany anyqtaldy. «Qoǵamdyq jumystar» baǵdarlamasyna qatyspaǵan 122 adam eńbekaqy alǵan.
Bul rette «Jastar tájirıbesi» jáne «Aqyly qoǵamdyq jumystar» memlekettik baǵdarlamalarynyń 4 myńnan astam qatysýshysy 2023 jylǵa arnalǵan mindetti medısınalyq saqtandyrý tólemderin almaǵan. Barlyǵy – 11,6 mln teńge.
Materıaldar sotqa deıingi tergep-tekserýlerdiń biryńǵaı tizilimine tirkelip, tergeý úshin Túrkistan oblysy boıynsha Ekonomıkalyq tergeý departamentine jiberildi.
Sonymen qatar prokýratýra 4 mlrd teńgeni quraıtyn qarjylyq buzýshylyqtardy jáne kelisim-sharttarda negizsiz talaptar qoıylǵan 760 kásipkerdiń quqyǵyn shekteý faktilerin anyqtady.