Mańǵystaýda kolledj dırektory iri mólsherde qarjy jymqyrǵany úshin sottaldy. Ol mekeme qyzmetkerlerine tıesili syıaqyny zańsyz ıemdengen, dep habarlaıdy Egemen.kz oblystyq prokýratýranyń baspasóz qyzmetine silteme jasap.
Memlekettik aıyptaýshylar bıýdjet qarajatynyń jumsalýynyń zańdylyǵyn taldaý barysynda gýmanıtarlyq kolledj dırektorynyń qyzmetkerlerge syıaqy tóleýge bólingen aqshany jymqyrǵanyn anyqtady.
«Atap aıtqanda, kolledj dırektory 2022 jyldyń jeltoqsanynan 2023 jyldyń tamyzyna deıingi aralyqta 29 qyzmetkerge syılyqaqy berý týraly negizsiz uıǵarym shyǵaryp, 29,5 mıllıon teńge kólemindegi qarajatty zańsyz ıemdengen», dep habarlady qadaǵalaý organy.
16 mamyrda Beıneý aýdandyq soty dırektordy 7 jylǵa bas bostandyǵynan aıyrdy. Keltirilgen zalal tolyq óndirildi.