Temirtaýda jańa emhana men otbasylyq demalys ortalyǵyn salý josparlandy, dep habarlaıdy Egemen.kz Qaraǵandy oblysy ákimdiginiń baspasóz qyzmetine silteme jasap.
Temirtaý qalasynda jeke qarajat esebinen azamattar úshin mańyzdy áleýmettik jobalar júzege asyrylady. Turǵyndarǵa jaıaý qashyqtyqta medısınalyq kómek kórsetý úshin úshinshi shaǵyn aýdanda jańa emhana ashý josparlandy. Al altynshy shaǵyn aýdanda zamanaýı úlgidegi «Otbasylyq demalys jáne balalardy damytý ortalyǵy» salynady.
Kózdelgen jobalardyń mán-jaıy Qaraǵandy oblysynyń ákimi Ermaǵanbet Bólekpaevqa Temirtaý qalasyna jumys sapary barysynda tanystyryldy.
Emhananyń qurylysy bıyl aıaqtalýy tıis. Nysan qaladaǵy jumys istep turǵan alǵashqy medısınalyq-sanıtarlyq kómek uıymdarynyń júktemesin jeńildetip qana qoımaı, 80-nen astam jumys ornyn ashýǵa múmkindik beredi. Jalpy tájirıbelik dárigerler, pedıatrlar, terapevter, akýsher-gınekologtar, sondaı-aq arnaıy mamandar qabyldaýdy júrgizedi.
Jańa ortalyq jobasynyń bastamashylarynyń aıtýynsha, nysannyń tujyrymdamasy otbasylyq demalystyń zamanaýı tendensııalaryna sáıkes ázirlengen. Úıirmeler men seksııalardaǵy balalardyń damýy ata-analarmen birlesken oıyn arqyly júzege asady. Osy maqsatta ınteraktıvti attraksıondardy salý kózdeldi. Ǵımarattyń dızaıny fýtýrıstik, ashyq tústermen erekshelenedi. Ortalyqqa aıyna 15 myńǵa deıin adam kele alady. Bul nysannyń ashylýy 2025 jylǵa josparlandy.
Qyrmyzy JUMAǴALIQYZY,
EUÝ stýdenti