QR Mádenıet salasynyń úzdigi, sazger Araılym Mamyrbek tanymal ánshi Toqtar Serikovke aýyr aıyp taǵyp otyr, dep jazady Egemen.kz.
Internet arnalardyń birinde kompozıtor «Baba dala baıany» dep atalatyn ánin Toqtar Serikov urlap aldy dep dabyl qaqty.
«О́z basym osy ýaqqa deıin Toqtar Serikovtiń ónerin jaqsy baǵalaıtynmyn. Ánderin súıip tyńdaıtynmyn. Biraq bir kúni aqpan aıynda onyń konsertin kózim shalyp qaldy. Bir kisi «Mynaý seniń ániń ǵoı» dep salyp jiberipti. Sózin ózgertip tastaǵan. Áýeni aınamaı uqsap tur endi. Jatyp kep telefon nómirin izdedim, tapqan nómirdiń bárine «Myna eki án qalaı uqsap ketken» dep jaza berdim. Ún joq, ekinshi ret qaıta jazǵanda meni buǵattap tastady. Sosyn kómekshisine telefon soǵyp edim, «Ol kisi qazir konsertterden bosamaıdy. Sizben sóılesýge múldem ýaqyty joq» dep jaýap berdi. «Álgi ándi konsertterde aıtpasyn, aldymen menimen kezdesip, osynyń aq-qarasyn ajyratyp alaıyq» dep oǵan aıtyp edim, «Joq, ol ánniń sózi de, áni de Toqtardyki» dep moıyndamady. «Sizdiń ánińiz sonshalyqty hıt pe edi, baıbalam salatyndaı ne kórindi» dep ózime qarsy shyqty», - dedi sazger.
О́ner ıesi bul ándi 2021-jyly jazǵan eken. Alaıda sózi unamaı, keıin basqa aqynǵa qaıta jazdyrǵan.
«Sózin Svetqalı Nurjan aǵaǵa qaıta jazdyrǵanmyn. Ol kisi birden kelisip, 2022-jyldyń sáýir aıynda «Baba dala baıany» degen atpen ándi tolyq jazylyp bitti. Biraq der kezinde onyń aranjırovkasyn istep, beınebaıanyn túsire qoıatyn qarajat bolmady. Biraz júrip qaldyq. Qarasha aıynda oryndap shyqtyq, saıttarǵa tarqattyq. Myna jaǵdaıdan keıin men áleýmettik jelide «Ánimdi qaıtaryńyz, Toqtar aǵa!» dep post jazyp saldym. Ol kisi bárin bilip, estip otyr. Biraq bir ret menimen baılanysqa shyǵyp, «Bul bylaı edi, qaryndasym» dep máseleni sheshýge tyrysqan joq», - dedi Araılym Mamyrbek.
Sazger endigi ánshi Toqtar Serikovti sotqa berýge daıyn ekenin aıtty.
«Sáýir aıynda Toqtar Serikov lám-mım demesten meniń ánimdi «Aýylym» degen atpen búkil platformalarǵa tarqatyp tastady. Osy jaǵdaıdan keıin meniń júıkem syr berdi. Ishimnen shyqqan ánimdi aıdyń-kúnniń amanynda ıemdenip kete salǵany janyma batty, densaýlyǵym nasharlap ketti. Eldiń bári «Sen Toqtardyń ánin urlap aıtyp júrsiń» dep jazatyn boldy. Osydan keıin sotqa shaǵymdanyp, ánimdi ózime qaıtaryp alǵym keledi. Dáleldeýge shamam jetedi, materıaldyq jáne moraldyq shyǵyn talap etemin», - dedi Araılym Mamyrbek.