Kún áli de salqyn bolǵanymen biraz aımaqta sýǵa shomylý maýsymy bastalyp ketti, dep habarlaıdy Egemen.kz Habar24-ke silteme jasap.
Dál qazirgideı qubylmaly kún raıy men sýdyń tolyq jylymaýy qaýip týdyrady. Byltyrǵy shomylý maýsymynda 177 adam sýǵa ketken. Onyń 53-i bala. Endi osyndaı qaıǵyly jaǵdaı bolmas úshin ne isteý kerek? Qandaı jumys atqarylyp jatyr? Taldyqorǵandaǵy qalalyq jaǵajaıda Qýat Nemerebaev sııaqty qutqarýshylar tańerteńnen keshki 8-ge deıin kezekshilik atqarady. Olar tynyǵýshylardyń jaǵalaýdan alystap, tereń jaqqa júzip barmaýyn qadaǵalaıdy. Negizinen balalardy basty nazarda ustaýǵa tyrysady. Sebebi sýǵa shomylyp júrgenderdiń kóbi eresekterdiń qaraýynsyz júrgen jasóspirimder.
«Sý sýyq bolǵannan keıin neshe túrli jaǵdaı bolady ǵoı. Sol úshin balalardy ata-analardyń qaraýynsyz jibermese eken deımiz. Sol kezde tótenshe jaǵdaı bolmaıdy», deıdi qutqarýshy Qýat Nemerebaev.
Qalalyq jaǵajaıǵa alty qutqarýshy bekitilgen. Onyń ekeýi TJD qyzmetkeri bolsa, qalǵany merdiger mekeme ókili. Sonymen qatar bir medısına qyzmetkeri kezekshilikke túsedi.
«Oblys aýmaǵynda úsh sý aıdyny bar. Taldyqorǵan jaǵajaıy, Balqash kóliniń jaǵalaýy, Alakóldiń jaǵalaýy. Atalǵan úsh orynda bizdiń jedel qutqarý stansııalary ornalasqan. Olar shomylý kezinde kúsheıtilgen rejımge kóshedi. Iаǵnı sýǵa shomylý maýsymyna deıin 10-15 adam bolsa, shomylý maýsymynda bir jarym eki esege deıin kóbeıedi», dedi Jetisý oblystyq TJD aǵa ofıseri Arystanbek Tómenov.
Aqmola oblysynda da shomylý maýsymy bastaldy. Aımaqta 80-nen asa kommýnaldyq jáne jekemenshik jaǵajaı bar. Sonyń 24-in tótenshe jaǵdaılar departamentiniń qyzmetkerleri sýǵa túsýge jaramsyz dep tanyǵan. Jalpy óńirde 80 qutqarýshy jáne 40 súńgýir tynyǵýshylardyń qaýipsizdigin qamtamasyz etedi.
«2023 jylǵy shomylý maýsymy kezinde 14 adam sýǵa batyp, qaıtys boldy. Sonyń beseýi bala. Qaıǵyly jaǵdaılar negizinen ishimdik ishý, balalardy qaraýsyz qaldyrý, júze bilmeý saldarynan bolyp otyr», dedi TJD basqarma bastyǵy Janat Asylbekov.
Bıylǵy tasqynǵa baılanysty Atyraýda sýǵa túsý maýsymy áli ashylǵan joq. Oǵan qashan ruqsat beriletini de ázirge belgisiz deıdi mamandar. Sebebi sý deńgeıi tómendegen joq. Kúsheıtilgen kestege saı jumys istep jatqan qutqarýshylar qaýipti jerlerge belgi qoıyp, ózen boıynda reıd júrgizip jatyr.
«Jaıyq óziniń arnasyna túskenge deıin óte qaýipti jaǵdaıda bolady. Astynda keıbir qaırań jerler jar bolyp ketýi múmkin. Qosalqy, bógde zattar, adamnyń ómirine qaýipti zattar bolýy múmkin sýdyń astynda. Soǵan baılanysty qaýipti dep tanımyz», deıdi jedel qutqarý jasaǵynyń basshysy Ádilhan Jumalıev.
Tótenshe jaǵdaılar qyzmetkerleri qaıǵyly jaǵdaılardyń kóbi úlkenderdiń salǵyrttyǵynan bolatynyn aıtady. Sondyqtan qutqarýshylar sýǵa shomylý kezinde qaýipsizdik erejelerin qatań saqtaý qajettigin eskertedi.