Astana qalasynyń Dene shynyqtyrý jáne sport basqarmasy men «Velolegend» qoǵamdyq bastamashyl tobynyń uıymdastyrýymen, qala ákimdigi qoldaýymen aýtızmi jáne aqyl-oı kemistigi bar balalarǵa arnalyp alǵash ret «Erekshe álem» atty jappaı buqaralyq velosherý ótti, dep habarlaıdy Egemen.kz qala ákimdiginiń resmı saıtyna silteme jasap.
Velosherýde sóz alǵan №6 Balalar men jasóspirimderdiń mamandandyrylǵan olımpıadalyq rezerv sport mektebiniń basshysy Baýyrjan Ýtegenov: «Qaı halyqtyń bolmasyn eldigin, salt-dástúrin bolashaqqa aparatyn jas urpaq. Memleket basshysy «Balalarǵa erekshe nazar aýdarý kerek. Sebebi olardyń amandyǵy – memleketimizdiń jarqyn bolashaǵynyń senimdi kepili», dep aıtqan bolatyn. Elimizde erekshe balalardy qosymsha bilimmen jáne sportpen qamtamasyz etý baǵytyna den qoıylyp, barlyq jaǵdaı jasalyp keledi. Balalardyń sporttyq áleýetin damytýǵa, olardyń qoǵamnan shet qalmaı, teń dárejede barsha múmkindikterge qol jetkize alýynda búgingi sharanyń mańyzy zor», dedi.
Sharaǵa 50-ge jýyq erekshe balalar men olardyń ata-analary qatysty. Olar 5 jáne 10 km qashyqtyqtardy «Úrker» (Ilınka) turǵyn alabynyń saıabaǵynan bastap baǵyndyrdy.
Buqaralyq velosherýge nemeresi Amıra Kalıevany qoldaýǵa kelgen Rysty Kabdýllına alǵysyn bildirdi.
«Munda ózderiniń balalaryn, nemererelerin qoldaýǵa kóptegen jandar kelip otyr. Bárimiz tolqyp turmyz. Bul erekshe múmkindikteri bar balalar arasynda ótip jatqan alǵashqy jarys. Qala ákimdigine rızashylyǵymdy bildiremin. Biz úshin bul jarys emes, merekelik is-shara», deıdi Rysty áje.
Velosherýdiń sońynda ár qatysýshy medalmen jáne «Lımpopo» sporttyq dúkeni usynǵan sertıfıkattarmen marapattaldy.