Búgin elordada rýhanı-tanymdyq habar taratatyn «ALQA» radıosynyń ashylý rásimi ótti, dep habarlaıdy Egemen.kz Astana ákimdiginiń resmı saıtyna silteme jasap.
Astana qalasy ákimdigi Din isteri jónindegi basqarmanyń qoldaýymen qurylǵan ınternet-radıoda qazaq halqynyń tól dúnıetanymy men turmys-salty, dástúri nasıhattalady.
Radıonyń ashylý rásimine jergilikti memlekettik organ, zııaly qaýym ókilderi, ǵalymdar men óner qaıratkerleri keldi. Qazaqstannyń eńbek sińirgen qaıratkeri, ánshi, akter Nurlan О́nerbaev pen Memlekettik Eltańbanyń avtory, sáýletshi Jandarbek Málibekov lenta qııý rásimine qatysty.
Sonymen qatar fılologııa ǵylymdarynyń doktory, ǵalym Aıgúl Symaqova, Dáýletkereı Kápuly, Ádil Ahmet saltanatty sharanyń qonaǵy boldy.
«ALQA» radıosynyń bas redaktory, Qazaqstan jazýshylar odaǵyny múshesi, aqyn Serik Seıitman radıonyń ataýyna qatysty pikir bildirdi.
«Alash qaıratkerlerimiz osydan 100 jyl buryn «Alqa» degen ádebı uıym qurǵan bolatyn. Biz osy ataýdy jańǵyrtý maqsatynda radıomyzdy «Alqa» dep atadyq.
Aldaǵy ýaqytta baǵdarlamalar qatary arta beredi. Bizdiń stýdııa alqa quryp otyryp, másele sheshetindeı, eldiń el bolýy jóninde suhbat quratyn ortalyqqa aınalady degen oıdamyz», dedi Serik Seıitman.
«ALQA»-da «Sheberler alqasy», «О́ner alqasy», «Sahnagerler alqasy» sııaqty baǵdarlamalar efırge shyǵady. Ári baǵdarlamalardy jýrnalıster emes, ónerdiń ár salasyna qatysty kásibı mamandar júrgizetin bolady.
«Radıo Astana qalasy ákimdigi Din isteri jónindegi basqarmaǵa qaraıdy, sondyqtan dinnen alys bolmaıdy. Teris aǵymdar beleń almaýy úshin olarmen kúres júrgizý elimizdiń árbir patrıotynyń, memlekettik qurylymnyń negizgi mindeti. Al olarǵa tosqaýyl bolatyn kúsh – bizdiń dástúrli dúnıetanymymyz. Sondyqtan radıomyzda qazaqtyń dúnıetanymynan alys ketpeıtin, dástúr, tarıh, mádenıet taqyrybyndaǵy baǵdarlamalar daıyndalady», dedi Serik Seıitman.