Sý resýrstary jáne ırrıgasııa mınıstri Nurjan Nurjigitov áriptesterin merekemen quttyqtap, sý tasqyny kezinde kórsetken kásibı qyzmetteri úshin alǵys aıtty, dep jazady Egemen.kz.
«Sizderdiń jumystaryńyz kópshilikke kórinbeýi múmkin, sebebi eldi mekenderden shalǵaı jerde jumys isteısizder. Qutqarýshylar sekildi úılerge kirip, qutqarmaısyzdar, polısııa qyzmetkerleri syndy kómekke kelmeısizder, dárigerler sekildi medısınalyq kómek kórsetpeısizder nemese muǵalimder syndy sabaq bermeısizder. Sizder ár úıdi, ár kásiporyndy jáne bútin elimizdi eń qundy resýrs – sýmen qamtamasyz etý úshin aýqymdy, biraq kórine bermeıtin jumysty atqarasyzdar. Árqaısyńyzdyń eńbekterińiz orasan zor, ony asyra baǵalaý múmkin emes. Sizder sý qubyrlaryn salyp, kanaldardy tazalap, sý qoımalaryn kúzetip, kezekshilikte bolyp, otbasylaryńyzdy sırek kóresizder. Sizderdiń qajyrly eńbekterińiz bolmasa aýyl sharýashylyǵy, ekonomıka, ónerkásip, kommýnaldyq jáne t.b. salalardyń sapaly jumysyn elestetý múmkin emes», dep jazdy mınıstr Facebook paraqshasynda.
Sondaı-aq mınıstr sý salasynyń mamandaryna qolaıly jaǵdaı jasaý úshin jalaqyny kóterý boıynsha jumys júrgizilip jatqanyn aıtty.
«Jalaqy kezeń-kezeńimen ósýde. 2024 jyldyń 1 qańtarynan eńbekaqysy tarıf esebinen tólenetin «Qazsýshar» mamandarynyń aılyǵy orta eseppen 23%-ǵa, al, eńbekaqysy respýblıkalyq bıýdjetten tólenetin qyzmetkerlerdiń aılyqtary 1 mamyrdan bastap orta eseppen 25%-ǵa artty.
Elimizde sýdy únemdeýge jáne ony qaıta paıdalanýǵa baǵyttalǵan jańa normatıvtik-quqyqtyq bazany qurý da mańyzdy. Infraqurylymdy aýqymdy jańǵyrtý jáne sý únemdeıtin ozyq tehnologııalardy engizý de Sizderdiń jumystaryńyzdy jeńildetedi. Biz jańa Sý kodeksin ázirledik. Qujattyń jańa redaksııasynda sýdy sarqylýdan, lastanýdan jáne bitelýden qorǵaýǵa basymdyq beriledi, al resýrstyń ózi endi tek ekonomıkalyq paıda kózi retinde qarastyrylmaıdy», dep qosty vedomstvo basshysy.
Budan bólek, mınıstrlik oblys ákimdikterimen birlesip 2030 jylǵa deıin sý qoımalaryn, gıdrotehnıkalyq qurylystardy, ırrıgasııalyq júıeler men toptyq sý qubyrlaryn salý jáne rekonstrýksııalaý jónindegi keshendi jospar ázirlegenin tilge tıek etti. Bul josparda 133 gıdrotehnıkalyq qurylysty, 7700 shaqyrymnan astam ırrıgasııalyq júıeni jáne 1200 shaqyrym toptyq sý qubyryn qaıta jańartý, sondaı-aq 3628 tik drenajdy uńǵyma burǵylaý kózdelgenin atap ótti.
«Bul nátıjelerge biz sizderdiń qajyrly eńbekterińiz ben kásibı biliktilikterińizdiń arqasynda qol jetkizdik. Barlyqtaryńyzǵa zor densaýlyq, baqyt, beıbit aspan jáne jaqyndaryńyzdyn amandyǵyn tileımin», dedi mınıstr Nurjan Nurjigitov.
Qyrmyzy JUMAǴALIQYZY,
EUÝ stýdenti