Búgin, 7 maýsymda Ǵylym jáne joǵary bilim mınıstrliginiń baspasóz qyzmeti Ulttyq biryńǵaı testileýdiń (UBT) aralyq nátıjeleri týraly aqparat usyndy. Belgili bolǵandaı, talapkerler «Oqý saýattylyǵy» páninen jaqsy nátıje kórsetken, dep habarlaıdy Egemen.kz.
Vedomstvonyń málimetinshe, negizgi UBT bastalǵaly beri 114 myń ret testileý tapsyryldy. Onyń ishinde talapkerlerdiń 74 paıyzy qazaq tilinde, 26 paıyzy orys tilinde, 110 adam aǵylshyn tilinde testileýden ótti.
Sonymen qatar mınıstrlik talapkerlerdiń 75 paıyzy shekti ball jınaǵanyn habarlady. Al ortasha 68 ball boldy. Eń joǵary ball – 138, ony Túrkistan oblysynyń oqýshysy jınady.
Sondaı-aq mamandardyń aıtýynsha, testileýden ótkennen keıin árbir talapker qandaı taqyryptardan qate jibergenderin kórip, jeke taqyryptyq taldaý alady.
«Úsh aptanyń qorytyndysy boıynsha talapkerler «Oqý saýattylyǵy» pánin úzdik tapsyrdy, orta eseppen ıgerý 75%-dy quraıdy. «Fızıkany» tapsyrǵan balalar nashar nátıje kórsetti – suraqtardyń tek 36%-yna ǵana durys jaýaptar berildi. Eń qıyn taqyryp «mehanıkalyq tolqyndar» boldy», dep málimdedi mınıstrliktiń baspasóz qyzmeti.
Aıta keteıik, UBT-2024 aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný jáne erejelerdi buzý faktileri anyqtalsa, talapkerdiń synaq nátıjeleri joıylady.
Eske sala keteıik, 2024 jyldyń 24 mamyrynda smartfon men basqa da tyıym salynǵan zattardy paıdalanǵan 32 talapker test tapsyrý quqyǵynan aıyrylǵan edi.
Qyrmyzy JUMAǴALIQYZY,
EUÝ stýdenti