Qaraǵandy oblysynyń polıseıleri zorlyq-zombylyq kórsetip zeınetker, múmkindigi shekteýli azamattardyń páterin tartyp alýmen aınalysqan qylmystyq topty ustady, dep jazady Egemen.kz.
Zańger, advokat, notarıýstan quralǵan qylmystyq top 14 páterdi zańsyz rásimdegen. Olar kóbine egde jastaǵy kisiler men esirtkige táýeldi adamdardyń múlkin qoldy etip otyrǵan.
«13 mamyr kúni tintý is-sharalaryn júrgizý barysynda ártúrli jyljymaıtyn múlik pen tulǵalardyń jeke derekterine qatysty kóptegen qujat tárkilendi. Qylmystyq toptyń 28 múshesi ustaldy. Olardyń osyndaı basqa da qylmystarǵa qatysy bar-joǵy tekserilip jatyr. Asa iri mólsherdegi alaıaqtyq faktisi boıynsha tergeý bastaldy», dedi IIM uıymdasqan qylmysqa qarsy kúres departamentiniń ókili Qýandyq Alpys.
Isti tergep-tekserý kezinde qylmystyq toptyń bir múshesi destrýktıvti dinniń jaqtaýshysy ekeni anyqtaldy.