Balalar men jasóspirimderge arnalǵan sport seksııalaryna memlekettik sporttyq tapsyrysty ornalastyrý jáne olardyń jumys isteýi qaǵıdalaryna ózgerister engizildi. Bul Týrızm jáne sport mınıstrliginiń 2024 jylǵy 17 mamyrdaǵy buıryǵy negizinde jasaldy, dep habarlaıdy Egemen.kz atalǵan mınıstrliktiń baspasóz qyzmetine silteme jasap.
Vedomstvonyń málimetinshe, endi sport seksııasyna qabyldaý kezegi aqparattyq júıede avtomatty rejımde júrgiziledi. Sondaı-aq balanyń jáne zańdy ókiliniń tegi, aty, ákesiniń aty (bar bolǵan jaǵdaıda), sport seksııasynyń túri, ótinishtiń nómiri men ýaqyty, sekýndtyń úlesine deıin dálme-dál, kezektegi rettik nómirdi qamtıtyn aqparattyq júıe usynǵan málimetter negizinde bólýge arnalǵan oryndardyń tizimin qamtıdy. Kezek balalardyń zańdy ókilderiniń bergen ótinishi boıynsha balanyń jas shekteýleri eskerile otyryp, ónim berýshiniń árbir sport seksııasy boıynsha jeke qurylady.
«Ishki ister organdarynda esepte turǵan devıantty minez-qulyqty balalar basym tártippen aqparattyq júıede tirkeledi. Osy normany qosý arqyly erejeler «Bilim týraly» zańnyń 47-babynyń 5-1-tarmaǵyna sáıkestendirildi. Budan bólek, túzetýlermen kezektegi pozısııa zańdy ókilderdiń ótinishti qaıtaryp alýyna baılanysty nemese vaýcherdi alý jáne balalardyń kezekten shyǵýy sebebinen kemý jaǵyna qaraı jáne osy vaýcherlerdi ónim berýshi keri qaıtaryp alǵan balalardyń kezekke oralý sebebi boıynsha ósý jaǵyna qaraı jyljýy kózdeledi. Kezekte oryn aýystyrýǵa jol berilmeıdi», delingen habarlamada.
Bul túzetýler normatıvtik quqyqtyq aktini aqparattyq júıeniń qoldanystaǵy fýnksıonalyna sáıkes keltirý úshin engizilgen. Máselen, qazir is júzinde kezekte balanyń jáne zańdy ókiliniń aty-jóni, ótinishtiń berilgen kúni, sport seksııasynyń túri, kezektegi rettik nómiri kórsetiledi.