Almaty qalasynda ótip jatqan tasjoldaǵy velosporttan Azııa chempıonatynda Astana qalasynyń veloshabandozy kúmis júldeger atandy, dep habarlaıdy Egemen.kz elorda ákimdiginiń resmı saıtyna silteme jasap.
Astanalyq Dmıtrıı Grýzdev erler arasyndaǵy jekeleı synda márege 50:20 sekýndta jetip, ekinshi orynǵa ıe boldy.
«Azııa chempıonatyna daıyndyǵym jaqsy ótti. Osy aralyqta jattyǵý jıyndarynan óttik. Jeńis mańdaı termen keldi, kóp eńbektendik, jattyqtyq, eńbek óz nátıjesin berdi», dedi Dmıtrıı Grýzdev.
Aıta ketsek, jarystyń alǵashqy kúninde ulttyq qurama aralas komandalyq estafetany altynmen bastaǵan bolatyn. Qurama sapynda Astana qalasynyń sportshysy Dmıtrıı Grýzdev óner kórsetti. Qazaqstan veloshabandozdary 40 km joldy 51 mınýt 08 sekýndta baǵyndyrdy.
12 maýsymǵa deıin jalǵasatyn sary qurlyq básekesine 30 elden 450-ge jýyq qatysýshy jınaldy.