Keıingi jyldary elimizde Memleket basshysynyń tapsyrmasymen mádenıet salasyn ilgeriletý aıasynda birqatar bastama qolǵa alyndy. Onyń ishinde halyqaralyq mádenı yntymaqtastyqty damytý is-sharalary da bar. Máselen, jýyrda mádenıet salasynyń qyzmetkerleri kezekti ret Fransııa, Germanııa, Italııa, Ońtústik Koreıa, Qytaı, AQSh, Túrkııa, Aýstrııa, Vengrııa, Grýzııa jáne basqa elderdiń jetekshi álemdik mádenı ortalyqtarynda biliktiligin arttyryp, oqyp keldi. Almaty ákimdiginiń málimetinshe, olar – kitaphanashy, murajaıtanýshy, muraǵatshy, haıýanattar baǵynyń veterınary, sırk jáne teatr ártisteri.
Sondaı-aq megapolıstiń mádenı nysandary 100% renovasııalyq jańarýdan ótkizilmek. Qyzmetkerler teorııada da, praktıkada da zamanaýı standarttar men klıentke baǵyttalǵan kommýnıkasııany zertteýge basa nazar aýdara otyryp, jańa daǵdylar men quzyretterge ıe bolady.
Halyqaralyq tájirıbe barysynda mýzeı qyzmetkerleri Fransııanyń ulttyq eskertkishter ortalyǵynda bilim alyp, «Musée du Louvre» jumys ádisterin zerttedi.
Al almatylyq kitaphanashylar Seýl kitaphanalarynda «Gachon University», «Namsan Public Library», «Starfield Library», «Nlcy», «Seoul Women's University Library» jáne «Chung Ang University Library» syndy taǵylymdamadan ótti.
Almaty sırkiniń ártisteri alǵash ret Beıjiń halyqaralyq akrobatıka mektebinde jáne Reseı teatr óneri ınstıtýty – GITIS-te biliktilikterin arttyrdy.
«Mádenıet salasynyń qyzmetkerleri alǵash ret osyndaı biregeı múmkindikke ıe boldy. Álemniń jetekshi mádenı ortalyqtarynyń qabyrǵasynda oqyp, kásibı daǵdylaryn jetildirdi. Qala ákimi Erbolat Dosaev atalǵan salany damytýǵa erekshe kóńil bóledi. Bul aýqymdy is-sharalardy ótkizý, mádenıet nysandaryn jańǵyrtý qyzmetkerlerdiń oı-órisin damytýǵa sózsiz áser etedi. Sırk jáne jergilikti teatr ártisteri, murajaıtanýshy men kitaphanashylar, sondaı-aq haıýanattar baǵy men muraǵat qyzmetkerleri – keıingi eki jylda 200-ge jýyq maman shetelde oqyp keldi», deıdi Almaty qalasy Mádenıet basqarmasynyń ókili.
Aıta keteıik, atalǵan sala qyzmetkerleriniń biliktiligin arttyrý el mádenıeti men týrızminiń damýyna qaı jaǵynan da tıimdi. Máselen, 2023 jyly týrızm sektory megapolıs bıýdjetine 71,7 mlrd teńgeden astam salyq túsimderin ákelgen. Iаǵnı byltyr Almatyǵa 2 mıllıon týrıst keldi. Bul – buryn-sońdy bolmaǵan rekordtyq kórsetkish.