Qurban aıt qarsańynda Bas múftı Naýryzbaı qajy Taǵanuly brıfıng ótkizip, kásipkerlerdi mal baǵasyn qoldan ósirmeýge shaqyrdy, dep jazady Egemen.kz.
16 maýsym kúni Qurban aıt merekesi bastalady. Ulyq meıram qarsańynda mal baǵasyn qoldan kóterý qubylysy jyl saıyn qaıtalanady. Osy máselege den qoıǵan Bas múftı kásipkerlerge halyqtyń áleýmettik jaǵdaıyn eskerip baǵa bekitýdi usyndy.
«Halqymyzda «Qaıyrymdylyq jasasań – qaıyryn óziń kóresiń» degen naqyl sóz bar. Paıǵambarymyz Muhammed (oǵan Allanyń salaýaty men sálemi bolsyn): «Kimde kim baýyrynyń qajetin ótese, Alla onyń qajetinde bolady. Kimde kim musylmannyń bir qaıǵysyn seıiltse, Alla onyń qaıǵy-qasiretteriniń birin seıiltedi», degen. Osy rette elimizdegi barsha kásipker azamattardy Qurban aıttyń qurmetine mal qunyn qoldan kótermeı, halyqtyń áleýmettik jaǵdaıyn eskerip, ońtaıly baǵa usynýǵa, jurtymyz kúnde tutynatyn azyq-túlikke múmkindiginshe jeńildik jasaýǵa shaqyramyn», dedi Naýryzbaı qajy Taǵanuly.
Sondaı-aq bas múftı qurban aıt meıramynyń basty maqsaty musylmandar arasynda ózara meıirimdilik, jomarttyq, qaıyrymdylyq, qanaǵat syndy adamgershilik qundylyqtardy qalyptastyrý ekenin eske saldy.