Pavlodar qalasyndaǵy Mútkenov kóshesinde bolǵan oqıǵa beınekameraǵa túsip qalyp, jergilikti turǵyndardyń úreıin týǵyzdy. Vıdeo kadrlarynda qolynda salqyn qarýy bar er adam ekinshi adamdy pyshaqtaǵany beınelengen, dep jazady Egemen.kz.
Áleýmettik jelide taraǵan aqparatqa qaraǵanda, er adam belgisiz sebeppen bóten adamnyń tamaǵyna pyshaq suǵyp, keıin oryndyqqa jaıbaraqat otyrǵan. Jábirlenýshi jedel járdem kelgenge deıin qaıtys boldy.
Oblystyq polısııa departamenti kúdikti ustalǵanyn málimdedi.
«Kúdikti Pavlodar qalasynyń polısııa basqarmasyna qarasty ýaqytsha ustaý ızolıatoryna qamaldy. Kisi óltirý faktisi boıynsha tergeý amaldary júrgizilip jatyr», dedi Pavlodar qalasy polısııa basqarmasy Soltústik polısııa bólimi bastyǵynyń orynbasary Jaras Ybyraev.