Osy kúni eń kóp taraǵan sport túriniń biri – fýtbol. Jasyl alańdaǵy saıys alýan-alýan qyzyqtarǵa toly. Sondaı-aq fýtbol tarıhynda shekten shyǵyp, shettetilgen sportshylar jaıynda sırek oqıǵa retinde oqta-tekte aıtylady. Al dop dodasy kezinde óz-ózine qyzyl qaǵaz kótergen tóreshi týraly estigenińiz bar ma?
Sóıtsek, mundaı da jaǵdaı bolady eken. «Pıterboro Nort End» — «Roıal Meıl» komandalarynyń kezekti oıynynda tóreshi Endı Ýeın qaqpashymen qaqtyǵysyp, ózin oıynnan shettetken. Al «Saýtgempton Arms» — «Herstborn Tarrant Brıtısh Legıon» komandalaryna tórelik etken Melvın Sılvester fýtbolshymen tóbelesip qalǵany úshin ózine qyzyl qaǵaz kórsetipti.
Úsh qaqpasy bar fýtbol
«Jumyr jerde teńbil dop» demekshi, onymen kásibı túrde aınalysatyndar da, sondaı-aq ony qyzyqtaýshylar da óte kóp. Qalypty fýtbol qos qaqpaly bolatynyn jaqsy bilemiz. Al atalǵan sporttyń úsh qaqpaly da túri bar ekenin bilesiz be?
1990 jyldary danııalyq sýretshi Asger Iorn úsh jaqty fýtboldy oılap tapty. Iаǵnı alty buryshty alańda úsh birdeı komanda oınaıdy. Taǵy bir qyzyǵy, munda ádettegideı kóp gol soqqan komanda emes, óz qaqpalaryna az gol ótkizgen komanda jeńimpaz atanady. Bul sport túrinen qazirgi kezde kóp festıval ótkizilip turady.
Myqtynyń aty –báribir myqty
2010 jyly 17 mamyrda Ispanııada óte bir erekshe fýtbol ótti. «Atletık Bılbao» fýtbol komandasy ardager oıynshy Hoseba Etberrııaǵa arnap qaıyrymdylyq matchyn uıymdastyrady. Bul dop dodasynyń ereksheligi sol – atalǵan komanda bir mezette 200 balaǵa qarsy oıyn ótkizedi.
Balalar 66-80-51 taktıkasyn ustanady. Iаǵnı jas talanttar klýbynyń quramynda 66 qorǵaýshy, 80 jartylaı qorǵaýshy, 51 shabýylshy, sondaı-aq 3 qaqpashy boldy. Biraq olar qansha kóp bolsa da, kásipqoı fýtbolshylarǵa tótep bere almady. Tartysty oıynda «Atletık Bılbao» 5:3 esebimen jeńiske jetti.