Joǵary qadaǵalaý organynyń alańynda memlekettiń ekonomıkaǵa qatysýyn azaıtý, bıznes úshin shyǵyndardy tómendetý, qylmystyq jazalardy jeńildetý jáne kásipkerlik qyzmetke aralasqan sheneýnikterdiń jaýapkershiligin qatańdatý máseleleri talqylandy, dep habarlaıdy Egemen.kz Bas prokýratýranyń baspasóz qyzmetine silteme jasap.
Kezdesýge QR Premer-mınıstriniń birinshi orynbasary R.V. Sklıar, QR Prezıdentiniń kómekshisi E.N. Jıenbaev, Parlament depýtattary, mınıstrlikter men vedomstvolardyń birinshi basshylary, Bıznes-Ombýdsmen, «Atameken» Ulttyq kásipkerler palatasy Tóralqasynyń Tóraǵasy, «KAZAKH INVEST» UK, «Samuryq-Qazyna» UÁQ, «Báıterek» UBH» AQ basshylyǵy, jeke bıznes ókilderi men ınvestorlar qatysty. Budan basqa, oblystar men aýdandardyń prokýrorlary, oblystar ákimderiniń orynbasarlary, kásipkerlik basqarmalarynyń bastyqtary jáne «Atameken» UKP óńirlik ókilderi jelige qosyldy.
Bas prokýror kezdesýdi bastap, Prezıdenttiń «Ekonomıkany yryqtandyrý jónindegi sharalar týraly» Jarlyǵy eldiń ekonomıkalyq áleýetin keńeıtý jáne ınvestısııalyq ahýalyn jaqsartý máselelerinde jańa jáne sheshýshi shara bolǵanyn atap ótti.
Kezdesýdiń ereksheligi bıznesti qorǵaý jáne ınvestısııalardy qoldaý salasyndaǵy jańa fýnksııalar men quraldardyń tusaýkeseri boldy. Olar Prezıdenttiń «Ekonomıkany yryqtandyrý jónindegi sharalar týraly» Jarlyǵymen prokýrorlarǵa bekitilip, zańdarda reglamentteledi.
Birinshi kezekte, bul prokýrorlardyń ótinim berýden bastap jobany tolyq iske qosýǵa deıingi mańyzdy ınvestısııalyq jobalardy súıemeldeýi. Búginde prokýrorlardyń nazarynda 32 trln teńgeden astam somaǵa 770-ten astam osyndaı joba bar.
Kezdesýge qatysqan «Big farm» JShS ıspan ınvestorynyń ókili Qazaqstan naryǵynan ketý aldynda turǵanyn aıtty. 3 jyl boıy ol aýyldyq jerlerde 400 jumys orny bar zamanaýı agroónerkásiptik keshen salý úshin jer ala almaı júrdi. Jobany prokýrordyń súıemeldeýimen alǵannan keıin ǵana ýchaske bólý týraly qajetti kelisimderge qol jetkizildi jáne joba iske qosyldy. Mundaı júzdegen mysaldar bar.
Bir jarym jyl ishinde prokýrorlar jobalaryn otandyq naryqta saqtap qalýǵa múmkindik alǵan 350 ınvestordy qorǵaýdy qamtamasyz etti. Olardyń el ekonomıkasyna salǵan salymdarynyń jalpy quny 6,4 trln teńgeni quraıdy.
Jaqyn arada Bas prokýratýra óz saıtynda prokýrordyń súıemeldeýimen bolatyn jobalardyń biryńǵaı pýlyn ornalastyrady. Qadaǵalaýdyń taǵy bir negizgi quraly «prokýrorlyq súzgi» boldy, ol bir jyldan astam ýaqyt boıy ınvestorlarǵa óz jobalaryn kedergisiz júzege asyrýǵa múmkindik berdi. «Prokýrorlyq súzgi» sheńberinde memlekettik organdar men shekteý sıpatyndaǵy kvazımemlekettik sektordyń barlyq sheshimderi prokýror keliskennen keıin ǵana shyǵarylady. Prokýrordyń kelisiminsiz salyqtyq tekserýler de taǵaıyndalmaıdy. Búgin súzgiden ınvestorlardyń múddelerin qozǵaıtyn 2 myńnan astam sheshim ótti, onyń 270-i boıynsha kelisýden bas tartyldy.
Ekonomıkany yryqtandyrý barysynda súzgi shekaralary keńeıtiledi jáne prokýrordyń kelisimi ákimshilik jaza qoldaný, talap qoıý jáne ınvestorlarǵa qatysty tekserýler taǵaıyndaý kezinde mindetti bolady. Rasynda, «prokýrorlyq súzgi» sheneýnikterdiń josyqsyz sheshimderine tosqaýyl bolady jáne ınvestısııalar salasyndaǵy árbir árekettiń zańdy bolýyn qamtamasyz etedi.
Úkimet engizip jatqan «Jasyl dáliz» jáne «Biryńǵaı sıfrlyq ınvestısııalyq platforma» jobalary ınvestısııalyq klımatty jaqsartý jónindegi mańyzdy quraldar bolady. Olar ınvestorlardyń Qazaqstan naryǵyna kirýiniń jeńildetilgen jaǵdaılaryn jáne ınvestısııalyq jobalardyń barlyq kezeńderin sıfrlandyrýdy qamtıdy. Memlekettik organdar tarapynan zańsyz áreketter bolǵan jaǵdaıda «aqyldy» júıe sharalar qabyldaý úshin prokýratýraǵa sıgnal beredi. Osyndaı jáne basqa da sıgnaldar boıynsha jedel den qoıý úshin ár óńirde ınvestorlar men bıznes úshin front-ofıster ashyldy, táýlik boıy call-ortalyqtar jáne kásipkerlerdiń quqyqtarynyń buzylýyna jedel den qoıýdyń mobıldi toptary jumys isteıdi.
Front-ofısterdiń jumysyna barlyq memlekettik organdar, Bıznes-Ombýdsmen, «Atameken» UKP jáne «KAZAKH INVEST» UK» AQ qosylǵan jáne kásipkerlerge kómek «bir tereze» qaǵıdaty boıynsha kórsetiledi.
«Búgin bıznes ókilderi prokýrorlarǵa aldyn ala jazylýsyz tikeleı júgine alady jáne dereý kómek ala alady», dep atap ótti óz sózinde «Atameken» UKP Tóralqa Tóraǵasy Raıymbek Batalov.
Elimizdegi eń iri kásipkerler birlestiginiń basshysy prokýratýra júrgizip jatqan jumys bıznes pen ınvestorlardy qorǵaýda tıimdi ekenin atap ótti.
Buǵan kásipkerlerdiń 300 myńnan astam qorǵalǵan quqyqtaryn rastaý, olarǵa qatysty 2,5 jyl ishinde prokýrorlar 16 myńnan astam zańsyz tekserýlerdi, 13 myń atqarýshylyq is júrgizýdi, 22 myń shekteý sharalaryn jáne 2,2 mlrd teńgege 12 myń negizsiz ákimshilik aıyppuldardy alyp tastaı aldy.
«Biz bul júıelilik pen zańnamalyq retteýdi talap etetin orasan zor eńbek ekenin túsinemiz. Bul baǵytta Prezıdenttiń ekonomıkany yryqtandyrý týraly tapsyrmasy aıasynda birlesken jumys kútip tur», dep túıindedi Raıymbek Batalov.
Bıznes-ombýdsmen memlekettik apparattyń bıznes-qoǵamdastyqpen ózara is-qımyl máselelerinde júıelilik pen ashyqtyqtyń mańyzdylyǵyn atap ótip, bıznesti qorǵaý jáne iskerlik ortany damytý máselelerinde yntymaqtastyqqa daıyn ekendigin bildirdi.
Kezdesý sońynda Berik Asylov oblystar men qalalardyń prokýrorlaryna bıznes-qoǵamdastyq úshin «Ashyq esik kúnderin» ótkizýdi jáne qysqa merzimde árbir problemalyq máseleni sheshýdi tapsyrdy.
«Prezıdent Bas prokýratýraǵa kásipkerlik salasyndaǵy zańdylyqty qamtamasyz etý jáne ınvestısııalardy qoldaý máselelerinde sheshýshi ról júktedi.
Bizdiń ortaq mindetimiz - ákimshilik kedergiler men sybaılas jemqorlyqty joıa otyryp, elde bıznes júrgizý jáne ınvestısııalaý prosesin barynsha tikeleı jáne ashyq etý», dep túıindedi joǵary qadaǵalaý organynyń basshysy.
Bas prokýratýra, Syrtqy ister mınıstrligi, «Atameken» UKP jáne Kásipkerlerdiń quqyqtaryn qorǵaý jónindegi ýákil arasyndaǵy kezdesý qorytyndysy boıynsha ózara yntymaqtastyq týraly Memorandýmǵa qol qoıyldy, ol odan ári birlesken jumystyń naqty maqsattaryn belgiledi.
Qyrmyzy JUMAǴALIQYZY,
EUÝ stýdenti