«Ulytaýǵa bardyń ba?» deıdi Sársenbaı qarııa. Tek aıtyp qana qoımaıdy, týǵan jeriniń tumsa tabıǵatyn aıtyp tań qaldyrady. Áńgimesin osy suraqtan bastaıtyn aqsaqal alty aı ishinde 8 myń shaqyrym jol júrip, elimizdiń 20-dan astam qalasyn aralaǵan.
Zeınetker bul sapardy alty jyl armandaǵan. 2022-niń kókteminde oıy júzege asty. Bir qyzyǵy, ol tek saıahattamaıdy. Týǵan jeri týraly áńgimelep, qolónershilermen tanysady. Tipti sheberlerdiń arnaıy katalogin jınap, halyqaralyq IýNESKO uıymyna tapsyrǵan. Aldaǵy ýaqytta el týrızmin dáripteý úshin jer sharyn aralap shyqpaq oıy bar.
Harrısonnyń erligi
Ǵalamda erliktiń túri kóp. Sonyń biri – Harrısonnyń bastamasy. Onyń qanynda meıirim tunyp tur. Sebebi ol 2 mıllıonnan astam jańa týǵan náresteni qutqarǵan.
Aýstralııalyq azamat Djeıms Harrıson 1000-nan kóp ret qan tapsyrdy. Onyń sırek kezdesetin qan tobyndaǵy antıdeneler gemolıtıkalyq aýrýy bar jańa týǵan nárestelerdiń dertten aıyǵyp, ári qaraı ómir súrýine kómektesedi. Harrısonnyń donorlyǵynyń arqasynda shamamen 2 mıllıonnan astam náreste aman qaldy. Bir qyzyǵy, onyń ishinde Djeımstiń óz nemeresi de bar. Mine, ǵajap!
Jeýge jaramdy robot
Jańalyqtardan «Úı salatyn, operasııa jasaıtyn, soǵysatyn robot shyǵypty» degenderdi jıi estımiz. Oǵan qazir tań qalmaımyz da. Jeýge jaramdy robot shyǵypty.
Shveısarııa tehnologııalyq ınstıtýtynyń ǵalymdary adamnyń nemese janýarlardyń asqazanyna enetin robot jasap jatyr. Ony aýrýlardy dıagnostıkalaý, aǵzaǵa dárilerdi dál jetkizý úshin qoldanbaq. Iаǵnı robotty jeısiz, ol sizdiń asqazanyńyzǵa barady. Barady da, ózine tapsyrylǵan mindetti oryndaıdy. Ǵalymdar jeýge jaramdy robottardy jelatın-glıserın materıalynan jasady. «Robottar men taǵamdardy biriktirý – qyzyqty ári qıyn. Sebebi shekteý kóp, múmkindik az. Onyń bárin qoldan jasaımyn», dedi zerthana dırektory Darıo Floreano.