Bul joba «Nazarbaev zııatkerlik mektepteri» derbes bilim berý uıymy «ESEN Foundation», «BAQ» jáne «ANSA» qorlary konsorsıýmymen jáne «Amanat» partııasynyń qoldaýymen Aqmola oblysynyń Selınograd aýdanyndaǵy aýyl mektepterinde júzege asyp otyr.
Joǵaryda atalǵan derbes bilim berý uıymynyń basqarma tóraǵasy Ánýar Janǵozın óz sózinde Nazarbaev zııatkerlik mektepteri árqashan óz tájirıbesin bólisýge daıyn ekenin aıta kelip: «Bizdiń nazarymyz, ásirese aýyl mektepterine tústi. Sondyqtan balalardyń sapaly bilim alýy úshin otandyq mektepterdiń ishki áleýetin birlesip damytyp jatqanymyzǵa qýanyshtymyz», dedi ol.
Selınograd aýdanynyń Qaraótkel aýylyndaǵy mektep bazasynda 30 aýyldyq bilim oshaǵynyń dırektory men orynbasary strategııalyq josparlaý ádisteriniń tehnologııasymen tanysyp, mektepti damytý baǵdarlamasyn ázirleýdi úırendi. Sondaı-aq mektep boıynsha derekter negizinde sheshim qabyldaý jáne qabyldanǵan basqarýshylyq sheshimderdiń tıimdiligin baǵalaý daǵdylaryn pysyqtady.
Joba aıasynda Nazarbaev zııatkerlik mektepteri uıymynyń Pedagogıkalyq sheberlik ortalyǵy Selınograd aýdanynyń mektepterinde pedagogterdiń kásibı qajettilikterine zertteý júrgizip, sabaqtardy baqylaý jáne jańa oqý jylynda 30 aýyl mektebiniń basshylary men muǵalimderine arnalǵan birneshe biliktilikti arttyrý kýrsyn, semınar men sheberlik saǵatyn uıymdastyrady.
– Nazarbaev zııatkerlik mektepterimen birlesken jobanyń nátıjesi birneshe aýyldyq perspektıvti bilim ordalary bazasynda qurylatyn pedagogıkalyq akademııa bolmaq. Onyń jumysy ustazdardyń turaqty kásibı damýyna baǵyttalady. Ol úshin biz Pedagogıkalyq sheberlik ortalyǵymen birge trenerlerdi daıarlaımyz, – deıdi «ESEN Foundation» qorynyń ókili Kamıla Basharova.